އެމްޖޭއޭއިން މިއަދު ބުނީ މިދިޔަ ދެ އަހަރެއްހާ ދުވަހުގެ ތެރޭގައި އެ ޖަމިއްޔާއިން އެންމެ ބޮޑަށް ކަންބޮޑުވުން ފާޅުކޮށް އިސްލާހުކުރަން މަސައްކަތްކުރި އެއް ކަމަކީ 2023 ވަނަ އަހަރުގެ ޖެނުއަރީ މަހު އަމަލުކުރަން ފެށި ހެއްކާ ބެހޭ ގާނޫނުގައި ނޫސްވެރިންނަށް ފުޅާ ދާއިރާއެއްގައި މަސްދަރު ހާމަކުރަން މަޖުބޫރުވާ ގޮތަށް އޮތް އޮތުމާ މެދު ކަމަށެވެ.
އެމްޖޭއޭއިން ބުނެފައި ވަނީ އެ އިސްލާހުގެ ދެލިކޮޕީ އެކުލަވާލުމުގައި ސަރުކާރަށާއި ރައްޔިތުންގެ މަޖިލިހަށް އެ ޖަމިއްޔާއަށް ދެވެން އޮތް އެންމެ ފުރިހަމަ އެއްބާރުލުމެއް ދޭނެ ކަމުގެ ޔަގީންކަންދޭ ކަމަށެވެ. ނޫސްވެރިންނަށް ފަހިވާނެ ގޮތަށް އެ އިސްލާހުގެ މަސައްކަތް އަވަސްކޮށް ނިންމައި ގާނޫނަކަށްވެގެން އަންނާނެ ކަމަށް އުންމީދުކުރާ ކަމަށް ވެސް އެމްޖޭއޭއިން ވަނީ ބުނެފަ އެވެ.
އިއްޔެ ބޭއްވެވި ނޫސްވެރިންގެ ބައްދަލުވުމުގައި ރައީސް އޮފީހުގެ ޗީފް ސްޕޯކްސްޕާސަން، ހީނާ ވަލީދު ވިދާޅުވީ މި ސަރުކާރުގެ ވިސްނުން ހުރީ 20 ވަނަ ރައްޔިތުންގެ މަޖިލިހުގެ މަސައްކަތްތައް ފެށުމާ އެކު، ނޫސްވެރިންނަށް ފަހިވާ ގޮތަށް ހެއްކާ ބެހޭ ގާނޫނަށް އިސްލާހު ހުށަހަޅަން ކަމަށެވެ.
ހީނާ ވިދާޅުވި ގޮތުގައި ސަރުކާރުގެ ސްޓޭންޑަކީ ނޫސްވެރިންނަށް މިނިވަންކަމާ އެކު ނޫސްވެރިކަން ކުރެވޭނެ މާހައުލެއް އޮތުން ކަމަށާއި މިނިވަން ނޫސްވެރިކަމަކަށް ސަރުކާރުން އަބަދުވެސް ވަކާލާތު ކުރާނެ ކަމުގަ އެވެ.
ނޫސްވެރިން ލިޔާ ހަބަރުތަކުގެ މަސްދަރު ބައެއް ހާލަތްތަކުގައި ހާމަ ކުރުމަށް މަޖުބޫރު ކުރަން ކޯޓުން ކަނޑައެޅޭނެ ގޮތަށް އެމްޑީޕީގެ ސުޕަ މެޖޯރިޓީ އޮތް މަޖިލިހުން ފާސް ކުރި ހެއްކާ ބެހޭ ބިލު ކުރީގެ ރައީސް އިބްރާހިމް މުހައްމަދު ސޯލިހު ތަސްދީގު ކުރެއްވީ މިދިޔަ އަހަރުގެ ޖުލައި މަހު 18 ވަނަ ދުވަހު އެވެ.
