އޭދަފުށީގައި 1،000 ހައުސިން ޔުނިޓު އަޅަން ހަވާލުކޮށްފައި ވަނީ ޗައިނާގެ ސައިނޯހައިޑްރޯ ކޯޕަރޭޝަން ލިމިޓެޑާ އެވެ.
މަޝްރޫއުގެ މަސައްކަތް ކުރުމަށް އެ ކުންފުންޏާ ހަވާލުކުރުމަށް މިއަދު ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީގައި ބޭއްވި ރަސްމިއްޔާތުގައި މަސައްކަތުގެ ފަހުމުނާމާގައި ސޮއިކުރެއްވީ މިނިސްޓަރު ޑރ. އަބްދުﷲ މުއްތޮލިބެވެ. ސައިނޯހައިޑްރޯގެ ފަރާތުން ސޮއި ކުރައްވާފައި ވަނީ އެ ކުންފުނީގެ އެމްޑީ ޕޭން ގުއާންޒޫ އެވެ.
މި ފަހުމުނާމާގެ ދަށުން ސައިނޯހައިޑްރޯއިން މި މަޝްރޫއުގެ ޓެކްނިކަލް އަދި ފައިނޭންޝިއަލް ޕްރޮޕޯސަލް ތައްޔާރުކުރާނެ އެވެ.
ރައީސްކަން ލިބިވަޑައިގަތުމަށްފަހު އޭދަފުއްޓަށް ކުރެއްވި ފުރަތަމަ ދަތުރުފުޅުގައި ރައީސް ޑރ. މުހައްމަދު މުއިއްޒު ވިދާޅުވެފައި ވަނީ އެމަނިކުފާނުގެ އެޑްމިނިސްޓްރޭޝަނުގައި އިސްކަންދެއްވާނެ އެއް މައްސަލައަކީ ބޯހިޔާވަހިކަމުގެ މައްސަލަ ކަމަށެވެ. އެ މައްސަލަ ހައްލު ކުރުމުގެ ގޮތުން ރާއްޖޭގެ އެކި ސަރަހައްދުތަކުގައި އަޅަން ކަނޑައަޅާފައިވާ ހައުސިން ޔުނިޓުތަކުގެ ތެރެއިން އެންމެ ގިނަ ޔުނިޓު އަޅާނެ އެއް ރަށަކަށް އޭދަފުށި ވާނެ ކަމަށް ރައީސް ވިދާޅުވި އެވެ.
ރައީސް ވިދާޅުވެފައި ވަނީ ބަޖެޓުގައި ކަނޑައެޅިފައިވާ މަޝްރޫއަށް އަދި ޑިވެލޮޕަ ފައިނޭންސް މޮޑެލްގެ ތެރެއިންނާ އެކީގައި ރަށަށް ބޭނުންވާ އަދަދަށް ވުރެ މަދު ނުވާވަރުގެ ބޮޑު ހައުސިން މަޝްރޫއެއް އެ ރަށުގައި ހިންގައިދޭނެ ކަމަށެވެ.
އެފަހުން ނިމިދިޔަ ރައްޔިތުންގެ މަޖިލިސް އިންތިހާބުގެ ކެމްޕޭނުގައި އެޕްރީލުމަހުގެ ފަސްވަނަ ދުވަހު މާލޭގައި ބޭއްވި ހަފުލާއެއްގައި ވާހަކަދައްކަވަމުން ރައީސް ވިދާޅުވެފައި ވަނީ އޭދަފުށީގައި 1،000 ހައުސިން ޔުނިޓު އެޅުމަށް ބޭނުންވާ ހުއްދަތައްދީ، މަޝްރޫއު ވަރަށް އަވަހަށް ފައްޓަވާނެ ކަމަށެވެ. އެ މަޝްރޫއަކީ އޭދަފުށީ ދާއިރާގެ މެންބަރު އަހްމަދު ސަލީމުގެ އިސްނެންގެވުމާ އެކު، އެ ރަށުގައި ހިންގުމަށް އޭނާ ކުރެއްވި މަސައްކަތްތަކުގެ ނަތީޖާއެއް ކަމަށް ވެސް ރައީސް ފާހަގަކުރެއްވި އެވެ.
