މި މަޝްރޫއު އިފްތިތާހުކޮށްދެއްވީ އެކަމަށްޓަކައި ވެސްޓްޕާކުގައި ބޭއްވި ރަސްމިއްޔާތެއްގައި ޑިފެންސް މިނިސްޓަރު ގައްސާން މައުމޫންއެވެ.
މި ރަސްމިއްޔާތުގައި ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާ ބެހޭ ވަޒީރު އާދަމް ޝަރީފް އުމަރު އާއި އިމާރާތްކުރުމާއި ބިނާރާބެހޭ ވަޒީރު ޑރ.ޢަބްދު ﷲ މުއްތަލިބާއި އާރުޑީސީގެ މެނޭޖިންގ ޑިރެކްޓަރ ބްްރިގޭޑިއަރ ޖެނެރަލް (ރިޓަޔަޑް) އަލީ ޒުހައިރުގެ އިތުރުން ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހީމް ހިލްމީ ޢަސްކަރިއްޔާ އިސްބޭފުޅުންނާއި ސަރުކާރު އިސް ފަރާތްތައް ބައިވެރިވެ ވަޑައިގަތެވެ.
ދިވެހި ސިފައިންނާއި ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) ގެ އެހީތެރިކަމާއެކު ފަށާ މި މަޝްރޫއުގެ ދަށުން ފުރަތަމަ ފެންބޮޑުވުމުގެ މައްސަލަ ހައްލުކުރަން ނިންމާފައި ވަނީ ވެސްޓް ޕާކު ސަރަހައްދުގައިކަމަށް އާރުޑީސީން ބުނެއެވެ. މި މަޝްރޫއު ސިފައިން އަދި އާރްޑީސީއިން ކުރިއަށް ގެންދަނީ ބޭނުންވާ ތަކެތި ފޯރުކޮށްދިނުމުން ހިލޭ މަސައްކަތް ކުރާ ގޮތަށެވެ.
މާލޭގައި ފެންބޮޑުވުން ހައްލުކުރުމުގެ މަޝްރޫ ފެށުމުގެ ރަސްމިއްޔާތުގެ ތެރެއިން
މީޑިއާތަކަށް ވާހަކަ ދައްކަވަމުން އާދަމް ޝަރީފް ވިދާޅުވީ ވެސްޓް ޕާކް ސަރަހައްދުގައި ދިމާވެފައިވާ ފެންބޮޑުވުމުގެ މައްސަލަ މަޝްރޫއުގެ ދަށުން ގިނަވެގެން ދެ ހަފްތާ ތެރޭގައި ހައްލުކޮށް ނިންމާލެވޭނެ ކަމަށެވެ.
