އިޒްރޭލުން މިހެން ބުނެފައި މިވަނީ ގާޒާގެ ދެކުނުގައި އޮންނަ ރަފަހް ސިޓީއަށް ވަދެގަނެ ބޮޑު އޮޕަރޭޝަނެއް ފައްޓައިފި ނަމަ އެމެރިކާއިން ބައެއް ހަތިޔާރު ސަޕްލައިކުރުން ހުއްޓާލާނެ ކަމުގެ އިންޒާރު ރައީސް ޖޯ ބައިޑަން އިޒްރޭލަށް ދެއްވައިފަ ވަނިކޮށެވެ.
އިޒްރޭލު ނޫސްވެރިންނާ ބައްދަލުކުރައްވާ އިސްރާއީލް އަސްކަރިއްޔާގެ ތަރުޖަމާނު، ޑެނިއަލް ހަގަރީ ބުނެފައިވަނީ އެމީހުން އަތުގައި ހަތިޔާރު އެބަ ހުރި ކަމަށާއި ރަފާހަށް އަރައިގަތުމަށް ބޭނުންވާ ހަތިޔާރު ވެސް ހުރި ކަމަށެވެ.
ގާޒާގައި އިސްރޭލުން ހިންގަމުންދާ އޮޕަރޭޝަންތައް ހުއްޓުވުމަށް އެމެރިކާގެ ޑިމޮކްރެޓިކް ޕާޓީ ބައެއް މެމްބަރުންނާއި އާންމުންގެ ގިނަ ބަޔަކު ވެސް ދަނީ ރައީސް ބައިޑަން އަށް ޕްރެޝަރު ކުރަމުން ނެވެ.
އިޒްރޭލަށް އެންމެ ބޮޑަށް ވާގިވެރިވާ އެމެރިކާ އިން އަހަރަކު ގާތްގަނޑަކަށް ތިން ބިލިއަން ޑޮލަރުގެ ހަތިޔާރު އިޒްރޭލަށް ފޯރުކޮށްދެ އެވެ.
ގާޒާގެ އާބާދީގެ ދެބައިކުޅަ އެއްބައި ކަމުގައިވާ މިލިއަނަކަށް ވުރެ ގިނަ އާންމުން ހިމާޔަތް ހޯދައިގެން މިވަގުތު ޖަމާވެފައި ތިބީ ރަފަހް ސިޓީގަ އެވެ. ރަފަހްގައި ހިމާޔަތް ހޯދައިގެން ތިބި މިލިއަނެއްހާ މީހުންނަށް ބޭނުންވާ ތެލާއި ކާބޯތަކެތި ނުވެއްދޭ ކަމަށް އދ. އިން ވަނީ ބުނެފަ އެވެ.
ނަމަވެސް އިޒްރާއީލުން ބުނަނީ ރަފަހް އަށް ޓާގެޓް ކޮށްފައިވާ ހަގުރާމައިގެ ޕްލޭން މުހިއްމު ކަމަށާއި އެއީ ހަމާސްއާއި ދެކޮޅަށް ކޮންމެހެން ވެސް ކުރައްޖެހޭ ހަގުރާމައެއް ކަމަށެވެ. އެގޮތުން އިޒްރޭލުން މިހާރުވެސް އަންނަނީ ހުއްޓުމެއް ނެތި ރަފަހް އަށް މިސައިލް ހަމަލާތައް ދެމުންނެވެ.
މިދިޔަ އަހަރުގެ އޮކްޓޯބަރު 7 ގައި ހަމާސް އިން އިޒްރޭލަށް ހަމަލާދީ ހާހަކަށް ވުރެ ގިނަ މީހުން މަރާލައި 250 މީހަކު ރަހީނު ކުރުމުން، ހަމާސް ނައްތާލަން ކަމަށް ބުނެ އިޒްރޭލުން ދޭން ފެށި ހަމަލާތަކުގައި ފަލަސްތީނުގެ 35،600 މީހަކު ވަނީ މިހާތަނަށް ޝަހީދު ކޮށްލައިފަ އެވެ.
