ސަޢޫދީ ޢަރަބިއްޔާގެ ރަސްގެފާނުގެ ޚާއްޞަ މެހެމާންދާރީގައި ކުރައްވާ އުމްރާ ދަތުރުފުޅުގައި ރައީސުލްޖުމްހޫރިއްޔާ ޑޮކްޓަރ މުހައްމަދު މުޢިއްޒު އަދި އެމަނިކުފާނުގެ އަނބިކަނބަލުން ސާޖިދާ މުހައްމަދު މަދީނާއަށް ވަޑައިގަތީ އިއްޔެއެވެ.
މި ދަތުރުފުޅުގެ ތެރެއިން ރައީސް ޑރ. މުހައްމަދު މުއިއްޒު ވަނީ މަދީނާގައި ކިޔަންވަން ތިބި ދިވެހި ދަރިވަރުންނާއި ބައްދަލުކުރައްވާފައެވެ. މި ބައްދަލުވުމުގައި އިސްލާމީ ކަންތައްތަކާއި ބެހޭ ވަޒީރު ޑރ. މުހައްމަދު ޝަހީމް އަލީ ސައީދުވެސް ވަނީ ބައިވެރިވެޑައިގެންފައެވެ.
މަދީނާގައި ތައުލީމު ހާސިލްކުރަމުންދާ 24 ދަރިވަރުން ބައިވެރިވި މި ބައްދަލުކުރެއްވުމުގައި އެ ދަރިވަރުންވަނީ އެކުދިން ބޭނުންވާ ކަންކަމާއި, އެކުދިންގެ ހުރި ކަންބޮޑުވުންތައް ރައީސުލްޖުމްހޫރިއްޔާ އާއި ހިއްސާކޮށްފައިކަމަށް ރައީސް އޮފީހުން ބުނެއެވެ.
މިއަދު ބައްދަލުކުރެއްވުމުގައި ވާހަކަ ދައްކަވަމުން ރައިސް ވަނީ އެ ދަރިވަރުން ފާހަގަކުރެއްވި ކަންކަން ބައްލަވައި އަދި އެކަންކަން ކޮށްދެއްވުމަށް މަސައްކަތްޕުޅު ކުރައްވާނެކަމުގެ ޔަޤީންކަން ދެއްވާފައެވެ.
ރައީސްގެ ދެކަނބަލުން ޕްރިންސް މުޙައްމަދު ބިން ޢަބްދުލްޢަޒީޒް އިންޓަރނޭޝަނަލް އެއަރޕޯޓަށް ވަޑައިގަތުމުން ދެކަނބަލުންނަށް މަރުހަބާ ދެންނެވީ، މަދީނާ ސަރަހައްދުގެ ގަވަރުނަރު، އަލްއަމީރް ސަލްމާން ބިން ސުލްޠާން ބިން ޢަބްދުލްޢަޒީޒް އާލް ސުއޫދެވެ.
ރައީސްގެ ދެކަނބަލުން މިއަދު ވަނީ މަދީނާގައި ހުންނަ ކީރިތި ރަސޫލާގެ މިސްކިތްކޮޅު މަސްޖިދުއް ނަބަވީއަށް ޒިޔާރަތްކުރައްވާފައެވެ.
ކީރިތި ރަސޫލާގެ މިސްކިތްކޮޅު މަސްޖިދުއް ނަބަވީއަށް ރައީސްގެ ދެކަނބަލުން ކުރެއްވި ޒިޔާރަތުގެ ތެރެއިން ފޮޓޯ: ސައުދީ ޕްރެސް އެޖެންސީ
މި ދަތުރުގައި ރައީސްގެ އަރިހުގައި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި އިސްލާމީ މަރުކަޒުގެ އިސް އިމާމު ފަޟީލަތުއްޝައިޚް މުހައްމަދު ލަތީފާއި ރައީސް އޮފީހުގެ ޗީފް އޮފް ސްޓާފް އަބްދުﷲ ފަޔާޒާއި މިނިސްޓަ އެޓް ދަ ޕްރެޒިޑެންޓްސް އޮފީސް ފޮ ޕްރެޒިޑެންޝަލް އެފެއާޒް އަލީ އާރިފްގެ އިތުރުން ރައީސް އޮފީހުގެ މިނިސްޓަރު އަބްދުﷲ ނާސިރު ބައިވެރިވެވަޑައިގަންނަވާ ކަމަށް ރައީސް އޮފީހުން ބުނެއެވެ.
