އެ ހެލިކޮޕްޓަރުތައް އޮޕަރޭޓް ކުރަމުން އައި އިންޑިއާގެ ހުރިހާ ސިފައިން މިދިޔަ ބުރާސްފަތި ދުވަހުގެ ނިޔަލަށް ރާއްޖެ އިން ފޮނުވާލާފައިވާތީ، އެކަމާ ގުޅޭ މައުލޫމާތު ނޫސްވެރިންނަށް ދިނުމަށް ބޭއްވި ބައްދަލުވުމުގައި ޑިފެންސް މިނިސްޓަރު މުހައްމަދު ޣައްސާން މައުމޫން ވިދާޅުވި ގޮތުގައި ހެލިކޮޕްޓަރުގެ މައްސަލަތައް މީގެ ކުރިން ރައްޔިތުންގެ މަޖިލީހުގެ 241 ކޮމިޓީން ބެލި އިރު ސިފައިންނަށް ނޭނގި ފްލައިޓެއް އަޅާފައިވާ މައްސަލަ ފެންމަތިވި އެވެ.
ޣައްސާން ވިދާޅުވީ ރައީސް އިބްރާހިމް މުހައްމަދު ސޯލިހުގެ ސަރުކާރުގައި މިފަދަ ތުހުމަތުތައް ކުރެވުނު ކަމަށާއި އެހެން ނަމަވެސް އެކަން އޭރު ޑިފެންސް އިން ދޮގު ކުރި ކަމަށެވެ.
މިނިސްޓަރު ޣައްސާން ވިދާޅުވީ މި ސަރުކާރުން ރާއްޖޭގެ ކޮމާންޑިން ކޮންޓްރޯލް ކުރާނެ ކަމަށާއި ދިވެހި އަސްކަރިއްޔާގެ ހުއްދަ ލިބިގެން ނޫނީ ހެލިކޮޕްޓަރު ދަތުރު ނުކުރެވޭނެ ކަމަށެވެ.
ހެލިކޮޕްޓަރުތައް އެމްއެންޑީއެފްގެ ހުއްދަ ނެތި ފްލައިޓުތައް އަޅާ ކަމުގެ ތުހުމަތު އޭރު ވެސް ވަރަށް ބޮޑަށް އޮތެވެ. ނަމަވެސް އޭރު އެމްއެންޑީއެފްގެ ވެރިންނާއި ޑިފެންސް މިނިސްޓްރީން ބުނެފައި ވަނީ އެ ހެލިކޮޕްޓަރުތަކަށް އެމްއެންޑީއެފްގެ ފުރިހަމަ ކޮމާންޑް އޮންނަ ކަމަށެވެ.
މި ސަރުކާރުން ވަނީ ހެލިކޮޕްޓަރުތައް އިޕަރޭޓް ކުރަމުން އައި އިންޑިއާގެ އަސްކަރިއްޔާގެ 76 އޮފިސަރެއް ފޮނުވާލުމަށް ފަހު ހެލިކޮޕްޓަރު އުފެއްދި ކުންފުނީގެ މީހުން އެ މަސައްކަތާ ހަވާލުވުމަށް ގެނެސްފަ އެވެ.
ޣައްސާން އިތުރަށް ވިދާޅުވީ އިންޑިއާ ސިފައިން މީގެ ކުރިން އުތުރުތިލަފަޅުގައި ތިބިކަން ކަށަވަރުވާ ވަރަށް ލިޔެކިޔުންތައް އެބަހުރި ކަމަށެވެ. ނަމަވެސް އޭރު އެ ތަނުގައި ތިބީ ކިތައް ސިފައިންކަން ޖެހޭނީ ބަލަން ކަމަށް އޭނާ ވިދާޅުވި އެވެ.
ރައީސް މުއިއްޒުގެ ވައުދާއި އެއްގޮތަށް އިންޑިއާ ސިފައިން ރާއްޖެއިން ފޮނުވާލެވިއްޖެކަން ފާހަގަކުރައްވާ މިނިސްޓަރު ޣައްސާން ވިދާޅުވީ، ކުރު މުއްދަތެއްގައި ތެރޭގައި އިންޑިއާ ސިފައިން ފޮނުވާލެވުނީ މަޝްވަރާގެ އުސޫލުގެ ތެރެއިން ރައީސް މުއިއްޒުގެ ހިކުމަތްތެރި ވިސްނުމުގެ ސަބަބުން ކަމަށެވެ.
