ފޮރިން މިނިސްޓްރީގައި ބޭއްވި މި ބައްދަލުކުރެއްވުމުގައި ރާއްޖޭގެ ހާރިޖީ ވުޒާރާގެ ސްޓޭޓް މިނިސްޓަރ ޝެރީނާ ޢަބްދުއްސަމަދު ވަނީ މިނިސްޓަރު ޓްރެވެލިއަން ރާއްޖެއަށް ކުރެއްވި ފުރަތަމަ ރަސްމީ ދަތުރުފުޅުގައި ހޫނު މަރުހަބާއެއް ދަންނަވައިފައެވެ.
ސްޓޭޓް މިނިސްޓަރ ޝެރީނާ ވިދާޅުވީ، މިނިސްޓަރ ޓްރެވެލިއަންގެ މި ދަތުރުފުޅުން ދޭހަކޮށްދެނީ އިނގިރޭސިވިލާތުގެ ސަރުކާރުން ރާއްޖެއާއެކު އޮތް ޒަމާންވީ ގުޅުން އިތުރަށް ބަދަހިކުރުމަށް ދެއްވާ އަހަންމިއްޔަތުކަން ކަމަށެވެ. މިނިސްޓަރ ޓްރެވެލިއަން ދެއްކެވި ވާހަކަފުޅުގައި، ދެގައުމުގެ މަސްލަހަތު ހިމެނޭ ގިނަ ދާއިރާތަކުން ދެގައުމުގެ ގުޅުން އިތުރަށް ބަދަހިކުރުމަށް ބޭނުންފުޅުވާ ކަމަށާއި، ރައީސް ޑރ. މުހައްމަދު މުއިއްޒުގެ އާ ސަރުކާރާއެކު އިތުރު ފުރުސަތުތައް ހޯއްދަވައިދެއްވުމަށް އުންމީދުކުރައްވާކަމުގައި ވިދާޅުވި އެވެ.
މި ބައްދަލުވުމުގައި، ކައުންޓާ ޓެރަރިޒަމް، މެރިޓައިމް ސެކިއުރިޓީ، ޓޫރިޒަމް، މަތީ ތައުލީމު، މޫސުމަށް އަންނަ ބަދަލު އަދި ވިޔަފާރީގެ ދާއިރާގައި ދެ ގައުުމުގެ ގުޅުން އިތުރަށް ބަދަހި ކުރަން މަޝްވަރާކޮށްފައިވެ އެވެ.
ރާއްޖެއިން އެކްސްޕޯޓު ކުރާ މަހުގެ ޓެރިފް ކުޑަވާ ގޮތަށް ރާއްޖެއާއެކު ފްރީޓްރޭޑް އެގްރީމެންޓެއް ހަދަން އިނގިރޭސިވިލާތުން ބޭނުންވާތީ އެކަމަށް ޝެރީނާ މަރުހަބާ ދެންނެވިއެވެ. އަދި މި އަހަރު ތެރޭގައި ލަންޑަންގައި ބާއްވަން ނިންމާފައިވާ އެކަމާ ގުޅޭ މަޝްވަރާތަކުގެ ދެވަނަ ބުރާ ގުޅޭ ގޮތުން ދެ ބޭފުޅުން ވާހަކަދެއްކެވި އެވެ.
މީގެ އިތުރުން، ޝެރީނާ ވަނީ ޣައްޒާގެ އިންސާނީ ހައްގުތަކާއި އިންސާނީ ހާލަތާމެދު ކަންބޮޑުވުން ފާޅުކުރައްވައި، ވަގުތުން ވަގުތަށް އަދި ދާއިމީ ގޮތެއްގައި ހަނގުރާމަ ހުއްޓާލުމަށް ރާއްޖެއިން ގޮވާލާކަން ތަކުރާރުކުރައްވާފަ އެވެ.
