ހިތަދޫ އުތުރު ދާއިރާގެ މެމްބަރު ކަން ކުރައްވާ އަސްލަމަކީ މަޖިލީހުގައި 19 ވަނަ މަޖިލީހުގައި އެންމެ ގިނަ ދުވަސްވީ މެންބަރުންގެ ތެރެއިން ބޭފުޅެކެވެ. މިދިޔަ ނޮވެމްބަރު މަހުން ފެށިގެން މަޖިލީހުގެ ރައީސްކަން ކުރައްވަމުން ގެންދަވާ އަސްލަމް ވަނީ މަޖިލީހުގައި ހަތަރު ދައުރު ފުރިހަމަ ކުރައްވާފައިފަ އެވެ.
އަސްލަމް ވިދާޅުވި ގޮތުގައި 28 މެއި 2019 އިން ފެށިގެން 19 ވަނަ މަޖިލީހުގެ ދައުރު ނިންމާލިއިރު 513 ޖަލްސާ ވަނީ ބާއްވާފައެވެ. އެއީ 1461 ގަޑިއިރު ކަމަށް އެމަނިކުފާނު ވިދާޅުވި އެވެ.
ޖުމުލަ 87 މެމްބަރުންގެ މައްޗަށް އެކުލެވި، އެ މަޖިލީހުގެ މެޖޯރިޓީ ފެށުނީއްސުރެ އެމްޑީޕީއަށް އޮތް 19 ވަނަ މަޖިލީހުގައި ޖުމުލަ 513 ޖަލްސާ ބާއްވާފައި ވާއިރު، އެއީ 1461 ގަޑިއިރު ކަމަށް، ރައްޔިތުންގެ މަޖިލީހުގައި ހަތަރު ދައުރު ވަނަ ދައުރެއް ފުރިހަމަ ކުރައްވާ އަސްލަމް ވިދާޅުވި އެވެ. ކޮމިޓީތަކުގެ ޖުމުލަ 3784 ބައްދަލުވުން ބޭއްވުނު ކަމަށާއި އެއީ ޖުމުލަ 4434 ގަޑިއިރު ކަމަށް ވެސް ވިދާޅުވި އެވެ.
މީގެ އިތުރުން އެކި މައްސަލަތަކާއި ގުޅޭ 153 ރިޕޯޓުގެ މަސައްކަތް ކޮށްފައިވާއިރު ވަޒީރުންނާ 384 ސުވާލު ކޮށްފައިވާ ކަމަށް ވެސް އަސްލަމް ވިދާޅުވި އެވެ. އަސްލަމް ވަނީ 19 ވަނަ މަޖިލިހުން ނިންމާފައިވާ މުހިންމު ބިލުތައް ވެސް ފާހަގަކުރައްވާފަ އެވެ.
އޭގެ ތެރޭގައި ހިމެނޭ ބައެއް ބިލުތައް:
- ރިޔާސީ ކޮމިޝަންތަކުގެ ބިލް
- ޤާނޫނީ ފަންނުގެ ބިލް
- ސަގާފީ ތަރިކައިގެ ބިލް
- މަސްވެރިކަމާއި ބެހޭ ބިލް
- ކުޑަކުދިންގެ އަދުލުގެ ބިލް
- އާމްދަނީން ޓެކްސްނެގުމުގެ ބިލް
- ޗަރޓަޑް އެކައުންޓެންޓުންގެ ބިލް
- ތަޢުލީމީ ބިލް
- އިންތިގާލީ އިންސާފުގެ ބިލް
- ފޮރިން ސަރވިސްގެ ބިލް
19 ވަނަ ރައްޔިތުންގެ މަޖިލީހުގައި ތަގުރީރުކުރެއްވި ގައުމުގެ ވެރިންގެ ތެރޭގައި ހިމެނެނީ އިންޑިއާގެ ބޮޑުވަޒީރު ނަރެންދުރަ މޯދީ އާއި ސްރީ ލަންކާގެ ބޮޑުވަޒީރު ރަނިލް ވިކްރަމަސިންހު އަދި ބަންގްލަދޭޝްގެ ބޮޑުވަޒީރު ޝެއިޚް ހަސީނާ އެވެ.
ކުރިއަށް 20 ވަނަ ރައްޔިތުންގެ މަޖިލީހަށް ނިމުނު މަހުގެ 21 ވަނަ ދުވަހު ވަނީ 93 މެންބަރުން ހޮވާފަ އެވެ. ވެރިކަން ކުރާ ޕީއެންސީ އިން އާ މަޖިލީހުގެ ސާފު އަގުލަބިއްޔަތު ހޯދާފައިވާއިރު އާ މަޖިލީހުގެ މެންބަރުން ހުވާ ކުރުން އޮންނާނީ ކުރިއަށް އޮތް މެއި 28 ވަނަ ދުވަހު އެވެ. ރަސްމީކޮށް، 19 ވަނަ މަޖިލީހުގެ ފަސް އަހަރުގެ ދައުރު ނިމޭނީ މިމަހު 27 ވަނަ ދުވަހަށެވެ.
