ހދ އަތޮޅު ކައުންސިލްގެ ރައީސް މުހައްމަދު ސިރާޖު މިދިޔަ ފެބްރުއަރީމަހުގެ 13 ވަނަ ދުވަހު ޗުއްޓީ ނެގި ގޮތަށް އަދިވެސް ހުރީ ޗުއްޓީގަ އެވެ. ސިރާޖު ހުރi ޗުއްޓީ އަލުން އިތުރުކުރަން އެދުމުން މި މައްސަލަ ވަނީ ކައުންސިލްގެ ބައްދަލުވުމަށްް އެޖެންޑާކޮށް މަޝްވަރާކޮށްފަ އެވެ.
ކައުންސިލް ބައްދަލުވުމުގައި ވާހަކަދެއްކެވި ކައުންސިލުން މެމްބަރުން ވަނީ ކައުންސިލްގެ ރައީސް ޗުއްޓީގައި ހުންނަވާތާ 92 ދުވަސް ވެފައިވާކަން ފާހަގަކޮށްފަ އެވެ. އަދި އެހާ ދުވަހު ޗުއްޓީގައި ހުރުމަށްފަހު އަނެއްކާވެސް ޗުއްޓީއަށް އެދުމުން ކައުންސިލް މެމްބަރުން ވަނީ އެކަމުގެ ކަންބޮޑުވުން ފާޅުކޮށްފަ އެވެ. އަދި އިތުރަށް ޗުއްޓީގެ ދިނުމަކީ ބަލައިގަނަވޭނެކަމެއް ނޫންކަމަށް ކައުންސިލްގެ މެމްބަރުން ވަނީ ފާހަގަކޮށްފަ އެވެ.
ކައުންސިލް މެމްބަރުންތަކުގެ މި ޝަކުވާތަކަށްފަހު ކައުންސިލްގެ ރައީސް އެދިފައިވާ ގޮތަށް ޗުއްޓީ އިތުކޮށް ނުދިނުމަށް ވަނީ ޖަލްސާގައި ފާސްކޮށްފަ އެވެ. އަދި 14 މެމްބަރުން ތިބޭ ކައުންސިލްގެ 9 މެމްބަރުންގެ ތާއީދާއެކު ކައުންސިލްގެ ރައީސް މަގާމުން ވަކިކުރުމަށް ގާނޫ ލަފާ ހޯދުމަށް ކަމާއި ބެހޭ އިދާރާތަކަށް ހުށައެޅުމަށް ވަނީ ފާސްކޮށްފަ އެވެ.
ކައުންސިލްގައި ވާހަކަ ދެއްކެވި މެމްބަރުން ވަނީ ކައުންސިލްގެ ރައީސް އިސްތިއުފާދިނުމަށްް ގޮވާލާފަ އެވެ. އަދި ގާނޫނީ މުއްދަތު އޮއްވާ އަތޮޅުކައުންސިލަށް ކުރިމަތިލާން ބޭނުންވާ އެހެން މީހުންނަށް ފުރުސަތު ދިނުމަށްވެސް ގޮވާލާފަ އެވެ.
ހދ. އަތޮޅު ކައުންސިލް ރައީސް މުހައްމަދު ސިރާޖު އެ ގޮނޑި ކާމިޔާބުކުރީ އެމްޑީޕީގެ ޓިކެޓްގަ އެވެ. އެހެންނަމަވެސް މިދިޔަ ރިޔާސީ އިންތިހާބުގެ ދެވަނަ ބުރުގައި ޑރ. މުއިއްޒު ބައިވެރިވި ކުޅުދުއްފުށީ ޖަލްސާގައި ސިރާޖު ވަނީ ޕީޕީއެމަށް ސޮއިކޮށްފަ އެވެ.
