މި އަދު ހެނދުނު ވިލާ ކޮލެޖުގައި ބޭއްވި މި ރަސްމިއްޔާތުގައި އެ ފަހުމުނާމަގައި ބީސީސީގެ ފަރާތުން ސޮއި ކުރެއްވީ، އެ ކޯޕަރޭޝަންގެ ޑެޕިއުޓީ މެނޭޖިން ޑިރެކްޓަރ ސާމިހު އާދަމް އެވެ. އަދި ވިލާ ކޮލެޖުގެ ފަރާތުން ސޮއި ކުރެއްވީ، ވައިސް ރެކްޓަރ ޑރ. އަލީ ނަޖީބް އެވެ.
އެ ފަހުމުނާމާގެ ދަށުން ދެފަރާތުން އެއްބާރުލުން ދިނުމަށް ހަމަޖެހިފައިވާ ދާއިރާ ތަކުގެ ތެރޭގައި، ދަރިވަރުންނަށް ވިޔަފާރިޔާ ގުޅުންހުރި ހުމަރުތައް ދަސްކޮށްދިނުމާއި، ބީސީސީން ފަންނީގޮތުން ވިޔަފާރިތަކަށް ފޯރުކޮށްދޭ އެކި ހިދުމަތް ތަކުގައި ވިލާކޮލެޖުގެ ފަރާތުން އެހީތެރިކަން ފޯރުކޮށްދިނުން ހިމެނެ އެވެ.
ރާއްޖޭގެ އެކި ސަރަހައްދު ތަކުގައި ބީސީސީން ގާއިމު ކޮށްފައިވާ ބިޒްނަސް ސެންޓަރުން ފޯރުކޮށްދޭ ހިދުމަތްތައް ފުރިހަމަ ކުރުމުގައި ވިޔަފާރި އާއި ގުޅުންހުރި ބައެއް ރިސާޗުތައް ހެދުމުގައި ދެ މުއައްސަސާ ގުޅިގެން މަސައްކަތް ކުރުމަށް ވަނީ އެއްބަސްވެފަ އެވެ.
މީގެ އިތުރުން، މުޖުތަމައުގައި ހަރަކާތްތެރިވާ އެކި ފަރާތްތަކާއި ގުޅިގެން ހޭލުންތެރިކުރުމުގެ އެކި ޕުރޮގުރާމްތަކާއި އިޖުތިމާއީ އަދި އިގްތިސާދީ ތަރައްގީ އާއި ގުޅުންހުރި އެކި ކަންކަމުގައި ބޭނުންވާ މައުލޫމާތު އެއްކުރުންވެސް ހިމެނެ އެވެ.
އަދި ކިޔަވާ ދަރިވަރުން ބޭނުންވާ އެކި މައުލޫމާތު އެއްކުރުމުގައި ދެ މުވައްސަސާގެ ތަޖުރިބާ އާއި ވަސީލަތްތަށް ހިއްސާކުރުމަށްވެސް ވަނީ ނިންމާފަ އެވެ.
