ހޫނުފެން ކައްކައިގެން ބާލިދީއަކަށް އަޅައިގެން ގެނެސް އަލީޒީ ފެންވަރުވަން އެންމެ އެކަށީގެންވާނެގޮތަށް އައިޝާ ފާޚާނާ ތައްޔާރުކޮށްލިއެވެ. ކޮޓަރީގައި އިންނަ ޕްލާސްޓިކް ގޮނޑި ފާޚާނާއަށް ވައްދާފައި، އަލީޒީ ބައިންދައިގެން އޯގާތެރިކަމާއެކު ފެންވަރުވަމުން ދިޔައިރު ހުއްޓުމެއްނެތި ކަރުނަ އޮހޮރެމުންދިޔައީ އައިޝާގެ ލޮލުންނެވެ. ހަގީގަތެއް ނޭގޭ ނުރައްކާތެރި ހިތާމައަކުން އަލީޒީގެ ހަޔާތް އަނދިރިވެފައިވާކަން އައިޝާއަށް ޔަގީނެވެ. އުފުލަމުންއެދާ ވޭންތަކަށް ތަސައްލީއެއް ގެނެސްދެވޭނީވެސް އަލީޒީގެ ދުލުން އެވާހަކަތައް ދުވަހަކުވެސް ހާމަކުރާނެނަމަ އެވެ. މާޒީއާއި ބެހޭގޮތުން އެންމެ ލަފްޒެއް ބުނެލާނެވަގުތަކަށްވެސް އައިޝާ ވަނީ ކެތްމަދުވެފަ އެވެ.
ހިތުގެ އެންމެ އަޑީން އައިޝާގެ އަޒުމެއް އޮވެ އެވެ. ހަމައެކަނި އަލީޒީއަށް ޓަކައެވެ. އެކުވެރިޔާ ވެއްޓިގެންދާ ވަގުތުގައިވެސް ހިފަހައްޓާލާނެ އަސާގަނޑެއްގެ ގޮތުގައި ހުންނާންޖެހުނަސް، އައިޝާ ހުރެދޭނެއެވެ. ދުވަހަކުވެސް އެކުވެރިޔާގެ ހާލަތައްޓަކައި ނުވަތަ އެކުވެރިޔާގެ އުޅުމާއި ގުޅުމަށްޓަކައި އަމިއްލައަށް އިންސާފުކޮށް އައިޝާ ގޮތެއް ނުނިންމާނެއެވެ. ހިތްވަރުދޭ އަދި ހެޔޮއެދޭ މީހެއްގެ ގޮތުގައި އެންމެ ގާތުގައި ވެދޭނެއެވެ. އަލީޒީއަށް ޖަވާބުދޭން އުނދަގޫވާނެ ހަމަ އެންމެ ސުވާލެއްވެސް އޭނާގެ މާޒީއާއި ގުޅެގޮތުން އައިޝާގެ ފަރާތުން ކުރިމަތި ނުކުރާނެއެވެ. ހިތް ނޭދޭ ޢިބާރާތެއްވެސް ނުވަތަ އެފަދަ ޖުމުލައެއްވެސް ގަސްތުގައި ބޭނުން ނުކުރާނެ އެވެ. އެކަންކަމުން އަލީޒީއަށް އިންތިހާ އަސަރުކުރާކަން އައިޝާއަށް ޔަގީންވާތީ އެވެ.
ފެންފުއްޓަށް އުފަން ނުވިޔަސް، ކިތަންމެ ފަހުން އެރަށުގައި ދިރިއުޅެން ފެށިކަމުގައި ވިޔަސް އެ ރަށު ރައްޔިތުން އަލީޒީއަށް އިޙްތިރާމް ކުރެއެވެ. އޭނާގެ މަޑުމައިތިރިކަމާއި ހިތްހެޔޮކަމާއި ހިނިތުންވުމަކީ ރަށުރައްޔިތުންގެ މެދުގައި މަގުބޫލު ސިފައެކެވެ. ގިނަބަޔަކާއި ގާތްގުޅުންތަކެއް ބާއްވައި، މީހުންގިނަ ތަންތާގައި ބޮނޑިވެ އޮލަ ވާހަކަ ދައްކަން ވަގުތު ހޭދަކުރުމަށްވުރެން ފަހާފޮށިދޮށުގައި އޭނާގެ އެވަގުތުތައް ހޭދަކުރުން އަލީޒީއަށް މާމުހިއްމެވެ. ފާއިތުވި މުއްދަތުގެ ތެރޭގައި އައިޝާވަނީ އޭނާގެ އެކުވެރިޔާގެ މިޒާޖު ދަސްކޮއްފަ އެވެ.
އަލީޒީ ފެންވަރުވައިގެން ނެރި، ތެތްހެދުން ބަދަލުކޮށްދީ ހެއަރޑްރަޔަރއިން އިސްތަށިގަނޑުވެސް ހިތްކައިދީ ފުނާއަޅައިދިނީވެސް އައިޝާއެވެ. ދެއަތާއި ދެފައިގައި ލޯޝަން ހާކައިދިނުމަށްފަހު، ހަލާކުވެފައި އޮތް ތަނުގައި ބޭސްވެސް އަޅައިދިނެވެ. ހިތުގެ ޒަޚަމުން ރިހުން ނުކެނޑޭނެ ކިތަންމެ ލަކުނެއް މިއަދުވެސް އައިޝާގެ ދެ ލޯ ފެންކަޅި ކޮށްލިއެވެ. ފިރުމާލާފައި އެ ލަކުނުތަކުގައި ލޯޝަން އުނގުޅާލަދިނުން ފިޔަވައި އައިޝާއަށް ކޮށްދެވޭނެ ކަމެއް ނެތެވެ.
އަލީޒީގެ އަތުގައި ހިފައިގެން ގެންގޮސް އެނދުގައި ބޭންދީ ނުހަނު އޯގާތެރިކަމާއެކު އެވެ.
"ވީއެންމެ އަވަހަކަށް އަހަރެން މިއަންނަނީ ކާއެއްޗެއް ހިފައިގެން.. ނިކަން އަރާމުކޮށް އޮށޯވެލައިގެން އޮވެލާ.. އޮށޯވެ އޮންނާން އުނދަގުލިއްޔާ ފުރަގަހަށް ބާލީހެއް ލައިގެން، ލެނގިލައިގެން އިނދެލާ އިނގޭ.... އަހަރެން ވަރަށް އަވަހަށް އެބައަންނަން.. ކޮންމެހެންވެސް ނިދުނަނުދީ އެސްފިޔަތައް ހިފަހައްޓާލާތި..!! ގަދަކަމުން ތިރިވާން އުޅެންޏާ ޓޭޕް ތަތްކޮއްގެންވެސް އެސްފިޔަތައް މައިތިރިކުރާތި.. އޮށޯވެ އޮންނަން އުނދަގޫވެގެންނޭ ކިޔާފައި ފަހާފޮށި ދޮށުގައި ނުއިށީންނާތި..!! އެމަސައްކަތްކުރަން އަދި ވަގުތު ލިބޭނެ.. އަހަރެން ހުއްޓައި އެކަމާ ހާސްވާކައްވެސް ނުޖެހޭނެދޯ.. ފެކްޓްރީއަކުން ފަހާލާ ފެންވަރަށް މިހާރު އެކަންކޮށްލެވޭނެ" ޖަވާބެއް ނުލިބޭނެކަން އެނގިހުރެ، ހީނލަމުން މަޖާގޮތަކަށް އައިޝާ ބުނެލީ މާހައުލު ބަދަލުކުރެވޭތޯ އެވެ.
ޖަވާބެއްގެ ގޮތުގައި އަލީޒީގެ ހިނިތުންވުމެއް ލިބޭނެކަމަށް އުއްމީދުކުރުމަށް އައިޝާގެ ސިކުނޑީގެ ކަނަކުން އިޝާރާތްކުރިނަމަވެސް ވަގުތާއި ހާލަތައް ބަލާފައި އޭނާ އެ އުއްމީދުވެސް ދޫކޮށްލިއެވެ. ކޮޓަރީން ނިކުންނަމުންވެސް އައިޝާ ބަލައިލީ އަލީޒީގެ ދިރުމެއް ނެތް މޫނަށެވެ. ﷲތައާލާއަށް ދުޢާދެންނެވުނީ އެ މައުސޫމު އަންހެންކުއްޖާގެ ވޭންތަކަށް ލުއިދެއްވުން އެދިއެވެ.. މޫނުމަތީން ފެންނަމުންދިޔަ ނުތަނަވަސްކަމާއި މާޔޫސްކަމުގެ ސަބަބުން މިއަދު އައިޝާ ބިރުގަތެވެ.
........
ހަފްތާއިން ބުރާސްފަތި ދުވަހެވެ. އައިޝާގެ ފިރިމީހާއަށް ރިސޯޓުން ހަމައެކަނި ޗުއްޓީ ލިބޭ ދުވަހެވެ. މިއަދަށްޓަކައި އަނބީން ކިތަންމެ ވަރަކަށްވެސް ތައްޔަރުވެއެވެ. އައިޝާއަކީވެސް ފިރިމީހާއަށްޓަކައި ކޮއްދެވެންހުރި ހުރިހާ ޚިދުމަތެއް ބުރާސްފަތި ދުވަހައް ޚާއްޞަކުރާ ވަފާތެރި އަންބެކެވެ. މުންޝިރު ރަށަށް އަންނާނީ މެންދުރު ނުވަތަ މެންދުރުފަހުއެވެ. ފަތިސްނަމާދުން އަވަދިވުމާއެކު އައިޝާ ވަނީ ބަދިގެއަށެވެ. މުންޝިރަށް އެންމެ މީރު ކެއުން ތައްޔާރުކުރުމަށެވެ. އެއަށްފަހު މުޅި ގޯތިތެރެ ކުނިކަހައި ގޭތެރެ ފޮހެ ސާފުކުރި އެވެ.
ތަފާތަކީ އެހެން ދުވަސްތަކާއި ޚިލާފައް މިއަދުގެ ހެނދުނު ގެއިން ނިކުންނަމުން މުންޝިރަށް ކާންހަދައި ތައްޓަށް ފެންއަޅައި ފެންތަށި ހިމެނޭގޮތުން ހުރިހާ ތައްޓެއްގައި މަތިޖަހާފައި ގެއިން ބޭރަށް ދިއުމެވެ. މުންޝިރު ކާވަގުތުގައިވެސް އެންމެ ގާތުގައި އިނުމަށް މިއަދު އުޒުރުވެރިވާކަން އައިޝާގެ އެ ހަރަކާތުން ސާފުކޮށް ފެނެ އެވެ.
އަލީޒީއަށްޓަކައި އެހެން ހުރިހާ ދުވަހެއް އައިޝާ ޚާއްސަކުރިޔަސް، ބުރާސްފަތި ދުވަހަކީ އައިޝާ އާންމުކޮށް ފެންނަ ދުވަހެއް ނޫނެވެ.
ނަމަވެސް މިއަދު ތަފާތެވެ. ނުވައެއް ނުޖަހަނީސް އައިގޮތަށް އެއިންނަނީ އަލީޒީ ކައިރިން ދުރަށް ނުދާންވެގެންނެވެ. ވެދެވުނު އެހީއަކުން އަލީޒީގެ ރިހުން ލުއިކޮށްދެވޭތޯއެވެ. އެންމެ މުހިއްމު ވަގުތުގައި އެންމެ ގާތުގައި ވެދޭށެވެ. އެކަނިވެރިއެއްކަމުގެ އިހްސާސް އަލީޒީއަށް ކުރެވުމަށް އެކުވެރިޔާ މިއަދު ބޭނުމެއްނޫނެވެ.
އެއްފަހަރު ބަނޑުގައި ފިރުމާލިއްޔާ އަނެއްފަހަރު އަރިކަށީގައި ނުވަތަ އުނގަނޑުގައި ފިރުމާލައެވެ. ބަނޑުގައި ރިހޭކަމަށް އަލީޒީ ނުބުންޏަސް، އުފުލަމުންދިޔަ ވޭނާއި ނުތަނަވަސްކަމާއި ހިތް ބިރުގަތްފައިވާ މިންވަރު އޭނާގެ މޫނުން ސާފުކޮށް އައިޝާއަށް ފެނެއެވެ. އެހެންދުވަސްތަކާއި ޚިލާފަށް މިއަދު އައިޝާ ވާހަކައެއްވެސް ނުދައްކަ އެވެ. ލޮލުން ކަރުނަހިކޭ އެންމެ ވަގުތެއްވެސް ނާދެއެވެ. އިރުއިރުކޮޅުން ސިއްރުން ކަރުނަ ފޮހެލައެވެ. މަޑުމަޑުން ހިންދިރުވާލާފައި އެއްޗެއް ބުނާން އަލީޒީއާ ގާތްވެލީ ޖެހިލުންވެ ހުރެއެވެ.
"އަލީޒީ.. ހެޔުނުވާނެ ސިއްހީ މަރުކަޒަށް ހިނގާ.. މިއަށްވުރެން ބޮޑުކަމެއްގައި އަހަރެން އަލީޒީ ކިބައިން ދުވަހަކުވެސް ނޭދޭނެކަމަށް ދެކެފައިވެސް އަހަރެންގެ މި އާދޭސް އަޑުއަހާ..! ޕްލީޒް...! އަހަންނަށްޓަކާ! އަހަރުމެން ދެމީހުންގެ އެކުވެރިކަމުގެ ހައްގުގައި.. ޕްލީޒް"
އަލީޒީގެ މޫނުގައި އައިޝާގެ ދެއަތުން ހިފަހައްޓާލިއިރު އަލީޒީގެ ތުންފަތް ތުރުތުރު އަޅައެވެ. ދެ ލޯ ރަތްވެ، މޫނުގެ ކުލަ ދޮންވެފައިވާ ޖަންބެއްފަދަ އެވެ.
ހަށިގަނޑުގައި އަޅަމުންދިޔަ ވޭނާއި ހިތައް ކުރަމުންދިޔަ އަސަރުތަކަށް، އަލީޒީގެ ގުނަވަންތަކަށް ކެތްނުވެގެން އެ ހަށިގަނޑަށް ލުޔެއްދޭން މަސައްކަތްކުރަނީކަމަށް އައިޝާއަށް ހީކުރެވުނެވެ.
"އިން ޝާ ﷲ ހުރިހާ ކަމެއްވެސްވާނީ އެންމެ ރަގަޅަށް... އަހަރެން ކެތް ކުރާނަން.. މި ރިހުމަށް އަހަންނަށް ކެތްކުރެވޭނެ" ނިކަން ހިތްވަރުކޮށްފައި މަޑުމަޑުން އަލީޒީ ބުނެލި އެވެ.
ހިތާއިހިތުން ކުރެވެމުންދިޔަ ދުޢާގެ އަޑު ޚުދު އަމިއްލަ ސިކުނޑިއަށްވެސް ސިއްރުކުރާން އަލީޒީ ބޭނުންވި އެވެ. އެއީ އެންމެ ރަގަޅުގޮތް ނޫންކަންވެސް އިގެއެވެ.
ނުވަމަސް މި ވޭނުގައި ކެތްކޮށްފި އެވެ. މުޅި ދިރިއުޅުން އެ ހަނދާންތަކާއެކު ތަހަންމަލްކުރާނެ ހަމަ އެންމެ ގޮތެއްވެސް އަލީޒީއަށް ނުވިސްނެ އެވެ. އެގޮތް އަލީޒީގެ ނަފުސު ބޭނުމެއްވެސް ނޫނެވެ. ހަގީގަތަކީ އެ ބުރަ މުޅި އުމުރަށް އުފުލަން އަލީޒީ ތައްޔާރުކަމެއް ނުވަތަ ނޫންކަމެއްވެސް ޚުދު އޭނާއަށްވެސް ނޭގެއެވެ. ހިތާއި ސިކުނޑި އަރާރުންވަނީއެވެ. ދުލުން އެންމެ ލަފްޒެއްވެސް އެކަމުގައި އަލީޒީ ބޭރުނުކުރާނެއެވެ.
"ތިވަރަށް ނުވިސްނާބަލަ... ޕްލީޒް! ހަމައެކަނި އަހަންނަށްޓަކައި... އަލީޒީގެ ހުއްދައާއި ނުލައި އެމްބިއުލަންސަށް އަހަންނަކަށް ނުގުޅޭނެ.."
އާއެކޭ ބުނެލާނެ ވަގުތަކަށް އެދި އައިޝާގެ ދެލޯ އިންތިހާއަށް އެދެނީއެވެ. އެހެން ގޮތެއް ނެތްކަން އެނގި އަލީޒީ އެކަމަށް އެއްބަސްވުމުގެ ގޮތުން ލޯމަރާލުމަށްފަހު ބޮލުގެ އިޝާރާތުން އާއެކޭ ބުނެލީ މަޖުބޫރީ ވަގުތަކަށްވީތީއެވެ.
"ތެންކިޔު.. ތެންކިޔު.. ތެންކިޔު.. ތެންކިޔު ސޯ މަޗް" އުފަލުން އައިޝާއަށް ރޮވުނެވެ.
"ހަމައެކަނި އައިޝާއަށްޓަކާ" ލޮލުންވެއްޓުނު ކަރުނަތިކި އަލީޒީގެ ތުންފަތާއި ހަމައަށް ދަތުރުކޮށްލީ ހަލުވިކަމާއެކު އެވެ.
ހިތުގައި އޮތް ބިރުވެރިކަމަށް ބާރު ފޯރުވޭތޯ ސިކުނޑި މަސައްކަތްކުރުވުމަށް އެގުނަވަނަށް އަލީޒީ މަޖުބޫރުވެސް ކުރާނެއެވެ. ދުވަހަކު ބޭޒާރުވިއްޔާ މިއަދު އެވަގުތުވެސް އަތުވެދާނެކަމަށް އަލީޒީގެ ހިއްސުތައް ބުނަންފެށިއެވެ. އެކަކު އަނެކަކުގެ ލޮލަށް ބަލައިލެވުނުވަގުތު، ދެމީހުންގެ ލޮލުންވެސް ހޯސްލާފައި ކަރުނަ އޮހޮރުނެވެ.
"ހިތްވަރުކުރާތި.. މިއީ މުޙިއްމު ވަގުތުކޮޅެއް" އަލީޒީގެ ބޮލުގައި ފިރުމާލަމުން އައިޝާ ބުންޏެވެ.
އައިޝާ އަވަސްވެގަތީ، ވަގުތުޖެހުމުގެކުރީން އެންބިއުލެންސް ގެނެސް އަލީޒީ ހޮސްޕިޓަލަށް ގެންދިއުމަށެވެ.
އެމްބިއުލަންސްގެ އަޑަކީ އަލީޒީއަށް ކިހާވަރެއްގެ ކަމެއްކަން އައިޝާއަށް އަންދާޒާކުރެވޭނީވެސް ކިހިނަކުން ހެއްޔެވެ؟
ސައިރަންގެ އަޑާއެކު އަލީޒީގެ ކޮންޓްރޯލް އޭނާގެ ކިބައިން ދިޔަނުދިޔަ އިރެއްވެސް ނޭގުނެވެ. ހާސްވެ ކަޅިހުއްޓުނުވަގުތު މާޒީގެ ހިޔަނި އޭނާގެ ސިކުނޑީގައި ވަކި ހިއްޕާލައިފިއެވެ. ކުއްލިޔަކަށް ނިއްކުރީން ދާތިކިތައް ހިލުވައިލިއެވެ. ނޭވާލާން އުނދަގޫވެއްޖެއެވެ. ކަންފަތަށް އިވެމުންދިޔައީ އުނދަގޫ އަޑުތަކެކެވެ. 'ވާނުވާނޭގުނީ' އަލީޒީއަށް ހިނދުކޮޅެއްވެސް ނުދީއެވެ.
..............
ބުނެދޭން ނޭގޭ ދުވަހެއްގެ، ބަޔާންކުރާންވެސް ކުޅަދާނަ ނުވާ ވަގުތެކެވެ.
އިވެމުންދިޔަ ސައިރަންގެ ގަދަ އަޑާއެކު މެރިފައިވާ ދެލޮލުގެ އެސްފިޔަތައް ހަރަކާތް ކޮށްލި އެވެ. ހަށީގައި ވިންދެއް ނެތަސް، އިވެމުންދިޔަ ގަދަ އަޑު ދެނެގަންނާން ދެލޯ އެދުނުފަދަ އެވެ. މަންޒަރު ވެއްޓެމުންދިޔަ ފިލްމެއް ފަދައިން ހުޅުވެމުން، ލެއްޕެމުންދިޔަ ކަޅިރަވައިގެ ދޭތެރެއިން ފެންނަމުންދިޔައީ އެތައް ބައެއްގެ ކަންބޮޑުވުމާއި އަވަސް ހަރަކާތްތަކެކެވެ. ފުލުހުންގެ ޔުނިފޯމްގައި ތިބި ބަޔަކާއި އާންމުންގެ އެތައް މޫނެއް އަލީޒީގެ ދެލޮލުގެ ކަޅި ތަސްވީރުކޮށްދިނެވެ. ސާފުނުވަނީ އެމީހުން ދައްކާ ވާހަކަތަކެވެ. އެއްފަހަރާ އެތައް ބަޔަކު ވާހަކަ ދައްކަނީއެވެ. ބައެއް މީހުން ހައިރާންވެ އަންތަރީސްވެގެން ބުނާ ޒާތުގެ އިބާރާތްތައް އަޑު އިވުނެވެ. ހިތްބަލި ބައެއް މީހުން ރޯ އަޑުވެސް އިވުނެވެ. ކޮންމެއަކަސް ގަދަ އަޑާއިއެކު، ދާދި އަވަހަށް އެންބިއުލާންސް ދުއްވާލައިފިއެވެ. އަލީޒީ ގޮވައިގެންނެވެ.
އެބަޔަކަށް ނޭގުނީ އަލީޒީގެ ހަށިގަނޑުގައި ދިރުންހުރި އެންމެ ގުނަވަނެއްވެސް ސަލާމަތް ނުކުރެވޭނެކަމެވެ. އަމިއްލަ ނަފުސަން މަލާމާތުގެ ހިންޏެއް އަންނާންވެސް އަލީޒީ ބޭނުންވިއެވެ. އެމީހުންގެ މޮޔަކަމަށްޓަކައެވެ. ދިރުމެއް ނެތް އެއްޗަކަށް ފުރާނައެއް އެޅުވިދާނެކަމަށް އެމީހުންނަށް ހީވާތީ އެވެ.
ދާދިއަވަހަށް އެ ގެންދިޔަ ތަނަކަށް ގެންގޮސްފިއެވެ. އަލީޒީ އުފުލި ބަޔަކު އުޅުނީ ދުވެލާފައެވެ. އާދަޔާ ޚިލާފަށް އަވަސް ހަރަކާތްތަކެކެވެ. އެކަން ޔަގީނެވެ. ކުއްލިޔަކަށް ހައިރާންކަން ލިބުނީ ޑޮކްޓަރުންނާއި ނަރުހުންނާއި ފުލުހުން އަލީޒީ ވަށައިގެން ހަރަކާތްތެރިވާ މަންޒަރު އެސްފިޔަތަކުގެ ތެރެއިން ފުރޭނިގެން ފެންނާން ފެށުމުންނެވެ.
މިވަނީ ކީއްހެއްޔެވެ؟ މިތަނުގައި މަދުވަނީ ޖަމާއަތްތެރީން ހެއްޔެވެ؟ ހަގީގަތުގައިވެސް އަލީޒީއަކަށް އެކައްޗެއްވެސް ނުވިސްނެއެވެ. ވެގެން މިއުޅެނީ ކީއްހެއްޔެވެ؟ އަލިގަދަ ބޮޑެތި ބޮކިތަކެއް ދިއްލާފައި ހުރިތަނެކެވެ. އެސްފިޔަތައް ލައްޕައިގެން އޮތަސް، އެ އަލިކަމުން އުނދަގޫ ވިއެވެ. ބުނެދޭން ނޭގޭ ޒާތުގެ ތަކެތިވެސް ފެންނަހެން ހީވިއެވެ. އަވަސް ހަރަކާތްތަކާއެކު ބައެއް ތަކެތި ތަޅުވާއަޑުވެސް އިވެއެވެ.
ސިއްސައިގެން ދިޔައީ އަތަށް އިންޖެކްޝަން ކަށި ހަރާލިކަން އެނގުމާއެކުއެވެ. މުޅިމީހާ ތުރުތުރުއަޅަންފެށީ ބާއްވާފައި އޮތް އެނދާވެސް އެކުގައެވެ. ދެތިން ހަތަރު މީހަކު ނުހަނު ހުށިޔާރުކަމާއެކު އޭނާ ހިފެހެއްޓި އެވެ.
މުޅި މަންޒަރު އެކުގައި ކަޅުވެއްޖެ އެވެ. ދެން ވީނުވީއެއް ނޭގުނީ ކީއްވެހެއްޔެވެ؟ އިވެންފެށީ ކޮންބައެއްގެ އަޑެއް ހެއްޔެވެ؟
-ނުނިމޭ-
