އެ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމުގައި ހަލީލް ވިދާޅުވީ ރާއްޖެ އެތެރެކުރާ ކާބޯތަކެއްޗަކީ ރައްކާތެރި އެއްޗަކަށް ހެދުމަށްޓަކައި މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)އަށް ބާރުތަކެއް ލިބިގެންދާނެ ކަމަށެވެ.
މިނިސްޓަރ ވިދާޅުވީ، ކާބޯތަކެތީގެ ރައްކާތެރިކަމާއި ގުޅޭ ބިލް 19 ވަނަ ރައްޔިތުންގެ މަޖިލީހުން ފާސްކޮށްފައިވާކަމަށެވެ. އަދި އެ ބިލް ގެޒެޓްވާ ހިސާބުން ފެށިގެން އެމްއެފްޑީއޭއަށް ހާއްސަ ބާރުތަކެއް ލިބިގެންދާނެ ކަމަށެވެ.
ހަލީލް ވިދާޅުވީ، ރާއްޖެއަށް އެތެރެކުރާ ކާބޯތަކެތި އެތެރެވާ ގޭޓާ ހިސާބުން އެތަކެތި ޓެސްޓުކޮށް އެއީ ރައްކާތެރި އެއްޗެއްކަން ކަށަވަރުކުރުމަށްފަހުގައި ނޫނީ އެތެރެ ނުކުރެވޭ ގޮތަށް ހެދުމުގެ ބާރު ލިބިގެންދާނެ ކަމަށެވެ. އަދި އެ ތަކެތި އެތެރެކުރުމުގެ ކުރިން (ސާމްޕަލް) އެމްއެފްޑީއޭއަށް ފޮނުވަން އުފައްދާ ކުންފުންޏަށް އެންގުމުގެ ބާރު ލިބޭނެ ކަމަށެވެ.
ހަލީލް އިތުރަށް ވިދާޅުވީ، ރާއްޖޭގައި ދަނޑުވެރިކަން ކުރަމުންދާއިރު ތަފާތު ކެމިކަލްތައް ބޭނުންކުރަމުން ގެންދާ ކަމަށާއި، ކާބޯތަކެތީގެ ބާވަތްތަކުގައި އެ ކެމިކަލް ހުރި މިންވަރު ދެނެގަންނަން ރާއްޖޭގައި ކުރެވެނީ މަދު ޓެސްޓުތަކެއް ކަމަށާއި އެ ސާމްޕަލް ތައް ނެގުމަށްފަހު ޓެސްޓު ކުރުމަށް ބޭރަށް ފޮނުވަން ޖެހިއްޖެ ހާލަތެއްގައި ފޮނުވުމުގެ އިންތިޒާމް ހަމަޖެއްސުމަށް ސަރުކާރުން މަޝްވަރާ ކުރަމުން އަންނަ ކަމަށެވެ.
