އެރަށުން މައުލޫމާތު ދިން މީހަކު ބުނި ގޮތުގައި މި ހާދިސާ ހިނގީ މިއަދު އިރުއޮއްސެން އުޅެނިކޮށެވެ. 10 އަހަރުގެ ކުއްޖާގެ ގައި މައްޗަށް ފާރު ވެއްޓުމުން ކުއްޖާއަށް ސީރިޔަސް އަނިޔާތަކެއް ލިބުނު ކަމަށް މައުލޫމާތު ދިނެވެ.
އެ ކުއްޖާ އެ ތަނުން ނެގީ ވެސް ކައިރީގައި ތިބި ކުދިންނެވެ. އެއަށްފަހު، ކައިރީގައި ހުރި ގެއަކަށް ގެންދިޔަ ކަމަށާއި ހެލްތު ސެންޓަރާ ހަމައަށް ގެންދެވުނީ ފަހުން ކަމަވެ އެވެ.
އެކުއްޖާއަށް މިހާރު އެރަށު ސިއްހީ މަރުކަޒުގައި ފަރުވާ ދެމުން އަންނަ ކަމަށާއި ކުއްޖާގެ ހާލު އެހާ ގޯސް ނޫން ކަމަށް މައުލޫމާތުލިބެ އެވެ.
ކަނޑޫދޫގައި މިއަދު ހަވީރު ވެއްޓުނު ފާރު؛
މި ވަގުތު އެ ރަށު ސިއްހީ މަރުކަޒުގައި ޓެސްޓުތައް ހެދެން ނެތުމުން ކުއްޖާގެ ހަށިގަނޑުގެ އެތެރެއަށް ގެއްލުމެއް ލިބުނުކަން ކަށަވަރު ނުވާ ކަމަށް އޭނާގެ އާއިލާއާއި ހަވާލާދީ އެރަށުން ވާހަކަދެއްކި މީހާ ބުންޏެވެ. އަދި، މޫސުން ތަންނުދޭތީވެ، އިތުރު ފަރުވާއަށް އެހެން ތަނަކަށް ދެވެން ނެތްކަމަށް އޭނާ ވަނީ ފާހަގަކޮށްފަ އެވެ.
ހަފްތާބަންދުގައި ރާއްޖޭގެ ހުރިހާ ސަރަަހައްދަކަށް ވެސް ވައިގަދަވެ، ބޯކޮށް ވިއްސާރަ ކުރާނެ ކަމަށް މޫސުމާ ބެހޭ އިދާރާ އިން ވަނީ ބުނެފަ އެވެ.
މިއަދު ވެސް ރާއްޖޭގެ ބޮޑު ބަޔަކަށް ޔެލޯ އެލާޓު ނެރެފައިވާ އިރު، ވިލާގަނޑުގައި 45 މޭލަށް ވައި ގަދަވާނެ ކަމަށް ލަފާކޮށްފައިވެ އެވެ.
