ރާއްޖޭގެ އެންމެ ދެކުނު ދެ އަތޮޅަށް ބާރު ވަޔާ އެކު ކޮޅިގަނޑެއް ލައްވާލާނެތީ މިއަދު މެންދުރުފަހު ތިނަކުން ފެށިގެން ރޭގަނޑު ހަތަކަށް މެޓުން އޮތީ އޮރެންޖް ސަމާލު ނެރެފަ އެވެ. އެ އިންޒާރު މިހާރު ވަނީ މިރޭ 11އަށް ދަންމާލައިފަ އެވެ.
މެޓް އިން މިއަދު ދެވަން ފަހަރަަށް ނެރުނު އިންޒާރު ވަނީ ގަޑިއަކު 34 މޭލާއި 40 މޭލާ ދެމެދުގެ ބާރުމިނުގައި ވައި ޖެހި އަދި ވިލާގަނޑުގައި ގަޑިއަކު 60 މޭލަށް ވައި ގަދަވެ، ކަނޑުތައް ގަދަވާނެ ކަމަށް ލަފާ ކޮށްފަ އެވެ.
މެޓު އޮފީހުން މޫސުން ދަރަޖަކޮށްފައި ވަނީ ވައިޓް، ޔެލޯ، އޮރެންޖާއި ރެޑުގެ އިތުރުން ވިއްސާރަ އަލިވުމުން ގްރީން ސަމާލެވެ. އާންމުކޮށް މޫސުން ގޯސްވުމުން އެ އިދާރާއިން ނެރެނީ ޔެލޯ ސަމާލެވެ.
ފުލުހުންނާއި، އެމްއެންޑީއެފް އަދި ޑިޒާސްޓާއިން ވަނީ މޫސުމަށް ސަމާލުވެ، މެޓް އޮފީހުގެ މި އިލްތިމާސްއާ ގުޅިގެން ކަނޑު ދަތުރުފަތުރުކުރުމުގައި ސަމާލުވާން އެދިފަ އެވެ. އެގޮތުން ރޭގަނޑު ދަތުރު ނުކުރުމަށާއި ދުވާލު ވަގުތުގައި ވެސް ކޮންމެހެން ކުރަން ޖެހޭ ދަތުރެއް ނޫނީ ނުކުރަން އެމްއެންޑީއެފްއިން ވަނީ އިލްތިމާސްކޮށްފަ އެވެ.
އަންނަ މަހާއި ޖުލައި މަހާއި އޯގަސްޓް މަސް އަދި ސެޕްޓެމްބަރު މަހުގެ ތެރޭގައި އުތުރާއި މެދުރާއްޖެތެރޭގެ އަތޮޅުތަކަށް އާންމުކޮށް ވާރޭވެހޭ ވަރަށް ވުރެ އިތުރަށް ވާރޭވެހޭނެ ކަމަށް މެޓުން ލަފާކުރެ އެވެ.
