އިންޑިއާގެ އެކްސްޓާނަލް އެފެއާޒް މިނިސްޓްރީން ކޮންމެ ހަފްތާއަކުވެސް ބާއްވަމުން ގެންދާ ނޫސްވެރިންގެ ބައްދަލުވުމުގައި އެ މިނިސްޓްރީގެ ތަރުޖަމާނު ރަންދީރް ޖައިސްވާލް ވިދާޅުވީ ދިފާއީ ދާއިރާ އިން ރާއްޖެއާއި އިންޑިއާ އާއި ދެމެދު ސޮއިކޮށްފައިވާ އެއްބަސްވުންތަކުގައި ރާއްޖޭގެ ދިފާއީ ދާއިރާ ވަރުގަދަކުރުމަށް އެހީތެރިވުމާއި ގާބިލްކަން އިތުރުކުރަން މަސައްކަތް ކުރުން ހިމެނޭ ކަމަށެވެ.
އެހެންކަމުން އިންޑިއާ އިން ހަދިޔާކޮށްފައިވާ އުޅަނދުތައް ދުއްވުމަށް ދިވެހި ސަރުކާރުން އެދިއްޖެނަމަ ދިވެހިން ތަމްރީން ކުރާނެ ކަމުގައިވެސް ވިދާޅުވި އެވެ.
އިންޑިއާގެ ތިން އަސްކަރީ އުޅަނދު އޮޕަރޭޓުކުރަން ރާއްޖޭގައި މިހާރު ތިބީ އެ ގައުމުގެ ސިފައިން ފޮނުވާލުމަށް ފަހު، ގެނައި މަދަނީ މީހުންނެވެ، އުޅަނދުތައް ދުއްވަން ގެނައި މަދަނީންނާ ބެހޭ މާގިނަ މައުލޫމާތެއް ސަރުކާރުން ހާމައެއް ނުކުރެ އެވެ. ނަމަވެސް، އޭގެތެރޭގައި ހެލިކޮޕްޓަރުތައް އުފެއްދި ހިންދުސްތާނު އޭރޯނޮޓިކްސް ލިމިޓަޑް (ހާލް)ގެ މުވައްޒަފުން ހިމެނޭ ކަން ޑިފެންސް މިނިސްޓަރު ވަނީ ކަށަވަރުކޮށްދެއްވާފަ އެވެ.
ހިންދުސްތާން އޭރޯނޮޓިކްސް ލިމިޓަޑް (ހާލް) އަކީ އިންޑިއާ ސަރުކާރުގެ ކުންފުންޏެކެވެ. މި ކުންފުންޏަކީ އެއާކްރާޕްޓް، ހެލިކޮޕްޓަރު، އޭވިއޯނިކްސް، މުވާސަލާތީ ސާމާނު އަދި މިލިޓަރީ ވަސީލަތްތައް ފަރުމާކޮށް، އުފައްދާ، ސަޕްލައި ކުރާ ކުންފުންޏެކެވެ. މި ކުންފުނި ހިންގުމުގެ އުސޫލުތައް ކަނޑައަޅަނީ އިންޑިއާ ސަރުކާރުންނެވެ. ކުންފުނީގެ ހުރިހާ ބޯޑު މެމްބަރުން އައްޔަން ކުރަނީ ވެސް، ޑިފެންސް މިނިސްޓްރީގެ ލަފާގެ މަތިން، އިންޑިއާގެ ރައީސް އެވެ.
އިންޑިއާ ސރުކާރުން ދިވެހި ޕައިލެޓުން ތަމްރީން ކޮށްދޭނެކަމަށް ވިދާޅުވިއިރު، ޑިފެންސް މިނިސްޓަރު ގައްސާން މައުމޫން ވަނީ ޑޯނިއާތަކާއި ހެލިކޮޕްޓަރުތައް ދުއްވުމުގެ ތަމްރީނުތައް ފުރިހަމަކޮށް ލައިސެންސް ލިބިފައިވާ އެންމެ ޕައިލެޓަކު ވެސް ސިފައިންގޭގައި މިހާރު ނެތް ކަމަށެވެ.
އިންޑިއާ އިން ރާއްޖެއަށް ހަދިޔާކޮށްފައިވާ ކަމަށް ވައިގެ އުޅަނދުތަކުގެ ތެރޭގައި ހިމެނެނީ ދެ ހެލިކޮޕްޓަރާއި ޑޯނިއާ މަތިންދާ ބޯޓެކެވެ. ލ އަތޮޅުގައާއި، އައްޑުއޮތޮޅުގައާއި އަދި ހަނިމާދޫގައި ކުރިންވެސް އޮޕްރޭޓް ކުރަމުން ގެދިޔަ އިންޑިޔާގެ އަސްކަރީ އުޅަނދުތައް އަދިވެސް އޮޕަރޭޓް ކުރަމުން އެ ގެންދަނީ "އިންޑިޔާ މީހުން" ނެވެ.
ކުރީގެ ރައީސް މުހައްމަދު ނަޝީދުގެ ވެރިކަމުގައި ގެނައި ހެލިކޮޕްޓަރާއި ކުރީގެ ރައީސް އަބްދުﷲ ޔާމީނުގެ ވެރިކަމުގައި ގެނައި ހެލިކޮޕްޓަރު އަދި ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި ގެނައި ޑޯނިއާ އާއެކު އިންޑިއާ ސިފައިން އައި މައިގަނޑު އެއް ސަބަބަކީވެސް ދިވެހިން ތަމްރީން ކުރުމެވެ.
މިހާތަނަށް އެކަން ވެފައި ނުވާއިރު، އިންޑިއާގެ މަދަނީން ގެނައުމަށް ވެވުނު އެއްބަސްވުމުގައިވެސް ދިވެހިން ތަމްރީނުކުރުމުގެ ވާހަކަ ހިމަނާފައިވާ ކަމަށް ފޮރިން މިނިސްޓަރު މޫސާ ޒަމީރު މިފަހުން ވަނީ ވިދާޅުވެފައި އެވެ.
