އެ ރަށު ކައުންސިލުން ވާހަކަ ދެއްކެވި މެމްބަރަކު ވިދާޅުވީ، 10 އަހަރުގެ އެ ފިރިހެން ކުއްޖާ ވެއްޓުނު ފާރެއްގެ ދަށުވީ، އެ އުމުރުގެ އެހެން ކުދިންތަކަކާއެކު ބޭރުގައި އުޅެނިކޮށް ކަމަށެވެ.
އެ ކުއްޖާ އެ ތަނުން ނެގީ ވެސް ކައިރީގައި ތިބި ކުދިންނެވެ. އެއަށްފަހު، ކައިރީގައި ހުރި ގެއަކަށް ގެންދިޔަ ކަމަށާއި ހެލްތު ސެންޓަރާ ހަމައަށް ގެންދެވުނީ ފަހުން ކަމަށް ކައުންސިލުން ބުންޏެވެ.
އެ ކުއްޖާއަށް އިތުރު ފަރުވާ ދިނުމަށް އެއާ އެމްބިއުލާންސްގެ ސީޕްލޭންގައި އިއްޔެ ވަނީ މާލެ ގެނެސްފައެވެ. އެ ކުއްޖާއަށް ފަރުވާ ދެމުންދަނީ އައިޖީއެމްއެޗްގައެވެ.
އައިޖީއެމްއެޗްގެ މީޑިއާ އޮފިޝަލު މިއަދު ވިދާޅުވީ އެ ކުއްޖާގެ ހާލު ރަނގަޅު ކަމަށެވެ. އަދި މިހާރު އެ ކުއްޖާ އޮތީ އީއެންޓީ ވޯޑްގައި އޮބްޒަވޭޝަންގައި ކަމަށް ވިދާޅުވި އެވެ.
ފާރު ވެއްޓުނު ހާދިސާއާ ގުޅިގެން އިތުރަށް ބަލަންޖެހޭ ކަންކަން ބަލަމުން އަންނަ ކަމަށް ފުލުހުން މީގެ ކުރިން ވަނީ ބުނެފަ އެވެ.
