މިނިސްޓްރީ އޮފް ޔޫތު އެމްޕަވަރމަންޓް، އިންފޮމޭޝަން އެންޑް އާޓްސް އިން ނެރުނު އިއުލާނެއްގައި ބުނެފައި ވަނީ، މޯލްޑިވްސް މީޑިއާ ކައުންސިލުގެ ގާނޫނުގެ ދަށުން އެކުލަވާލާފައިވާ މީޑިއާ ކައުންސިލްގެ އާންމު މެންބަރުންގެ ތެރެއިން އިތުރު މެންބަރެއްގެ މަގާމް ހުސްވެފައިވާތީ، އެމަގާމަށް މެންބަރަކު އިންތިހާބުކުރުމަށް ފުރުސަތު ހުޅުވާލައިފައިވާ ކަމަށެވެ.
އެ މިނިސްޓްރީން ބުނެފައި ވަނީ، އާންމު މެންބަރުންގެ ގޮތުގައި ބަލާނީ މީޑިއާއާ ގުޅުންހުރި އެއްވެސް ދާއިރާއެއްގައި މަސައްކަތް ނުކުރާ ފަރާތްތަށް ކަމަށާއި، ކައުންސިލުގެ މެންބަރުންގެ މުއްދަތަކީ 2 އަހަރު ކަމަށެވެ. އަދި އެއްވެސް ފަރާތަކަށް ކައުންސިލުގެ މެންބަރުކަމުގައި ވިދިވިދިގެން 2 ދައުރު އަދާ ނުކުރެވޭނެ ކަމަށެވެ.
ކައުންސިލުގެ މެންބަރެއްގެ ޝަރިތުތައް:
- ދިވެހިރައްޔިތަކު ކަމުގައިވުން
- އުމުރުން 18 އަހަރު ފުރިފައިވުން
- މަސްތުވާތަކެތީގެ ވިޔަފާރިކުރުމުގެ ކުށް ސާބިތުވެފައިވާ މީހަކު ކަމުގައި ނުވުން
- ކުޑަކުދީންނަށް ޖިންސީ ގޯނާކުރުމުގެ ކުށް ޝަރީޢަތަށް ސާބިތުވެފައިވާ މީހަކު ކަމުގައި ނުވުން
މެންބަރުކަމަށް ކުރިމަތިލުމަށް އެދޭ ފޯމާ އެކީ ހުށައަޅަން ޖެހޭތަކެއްޗަކީ، އައިޑެންޓިޓީ ކާޑުގެ ކޮޕީ، ތައުލީމީ ފެންވަރު އަންގައިދޭ ލިޔުންތަކުގެ ކޮޕީ، ކުށުގެ ރެކޯޑް އަދި ޕާސްޕޯޓް ސައިޒްގެ ފޮޓޯ އެކެވެ.
މީޑިއާ ކައުންސިލުގެ އާންމު މެންބަރުކަމަށް އެދޭ ފޯމް ހުށައެޅުމުގެ ސުންގަޑި އަކީ 23 މޭ 2024 ވާ ބުރާސްފަތި ދުވަހުގެ 14:00ގެ ކުރިންނެވެ.
