މިއީ، އަކްރަމް ކަމާލުއްދީން، މުސްތަފާ އަތުން އެކި ފަހަރު މަތިން ނަގާފައިވާ ފައިސާ ހޯދުމަށް މުސްތަފާ ސިވިލް ކޯޓުގައި އަކުރަމްއާ ދެކޮޅަށް އުފުލާފައިވާ ދައުވާއެއްގެ ހުކުމެވެ. މި މައްސަލަ މުސްތަފާގެ ފަރާތުން ސިވިލް ކޯޓަށް ހުށަހެޅީ، އަކްރަމް އޭނާގެ އަތުން ފައިސާ ނެގުމަށް ފަހު، އެ ފައިސާ އަނބުރާ ދެއްކުމުގެ ގޮތުން ދިން ޗެކުތަކަށް ފައިސާ ލިބިފައިނުވާ ކަމަށް ބުނެއެވެ.
މުސްތަފާގެ ދައުވާގައި ބުނެފައިވަނީ އޭނާގެ އަތުން އަކްރަމް 1.7 މިލިއަން ރުފިޔާ އަނބުރާ ދައްކާ ގޮތަށް ނަގާފައިވާ ކަމަށެވެ. އެހެންނަމަވެސް މުސްތަފާއަށް ކޯޓުގައި ސާބިތު ކޮށްދެވިފައިވަނީ 400،000 ރުފިޔާއާއި 50،000 ޑޮލަރުގެ މުއާމަލާތެއް އެކަންޏެވެ.
މި މައްސަލައިގައި މުސްތަފާއަށް ދައްކަންޖެހޭ ފައިސާގެ ތެރެއިން 400،000 ރުފިޔާ އަނބުރައި ރައްދުކޮށްފައިވާ ކަމަށް އަކްރަމްގެ ފަރާތުން ހުށަހެޅި ބަޔާނުގައިވެއެވެ. ނަމަވެސް، އެ ކަމަށް ހެއްކެއް ނެތުމާއި ހެކިވެރިއެއްގެ ކުރިމަތީގައި އެ ފައިސާ އަނބުރާ ރައްދުކުރިއިރު، ހެކިވެރިޔާގެ ކުރިމަތީގައި ދިން ފައިސާގެ އަދަދަކީ 200،000 ރުފިޔާކަން ސާބިތުވާތީ ކޯޓުން އަކްރަމްގެ މައްޗަށް ހުކުމްކޮށްފައިވަނީ މުސްތަފާއަށް އޭނާ އަނބުރައި ދޭންޖެހޭ 400،000 ރުފިޔާއާއި 50،000 ޑޮލަރު، ޖުލައި މަހުގެ 19ގެ ކުރިން ސިވިލް ކޯޓަށް ދެއްކުމަށެވެ.
