ޑިފެންސް މިނިސްޓްރީން ގެޒެޓް ކުރި އިއުލާނެއްގައި ބުނެފައި ވަނީ، އެއާޕޯޓްތައް ކައިރީ ޑްރޯން އެރުވުމަކީ ވައިގެ ދަތުރުފަތުރަށް އެކަމުގެ ސަބަބުން ނުރައްކަލެއް މެދުވެރިވެދާނެ ކަމެއް ކަމަށެވެ. އެހެންވެ ޑްރޯން އުދުއްސުމުގެ ކުރިން ހުއްދަ ހޯދުމަށް، އެ ވުޒާރާއިން މީގެ ކުރިންވެސް އަންގަފާއިވާ ގޮތަށް އަމަލުކުރުމަށް ވަނީ އިލްތިމާސްކުރައްވާފަ އެވެ.
އެ ވުޒާރާއިން ވަނީ، ރާއްޖޭގެ ކޮންމެ ދިމާއެއްގައި ޑްރޯން އަރުވަން ބޭނުންވި ކަމުގައިވިއަސް އެ މިނިސްޓްރީގެ ހުއްދަ ހޯދައިގެން އެކަންކުރަން އެދިފައިވެ އެވެ.
ޑްރޯން އުދުއްސުމުގެ ހުއްދަ ހޯދުމަށް ފޯމު ހުށަހަޅާއިރު ރަސްމީ ބަންދު ނޫން ތިން ދުވަސް ކުރިން ހުށަހަޅަންޖެހޭނެ ކަމަށްވެސް މިނިސްޓްރީގެ އެ އިއުލާނުގައި ބުނެފައިވެއެވެ. އަދި ހުއްދަ ނުހޯދާ ޑްރޯން އުދުއްސާ މީހުންނާ މެދު ފިޔަވަޅު އަޅާނެ ކަމަށް ވެސް ވަނީ ބުނެފައެވެ.
މީގެ އިތުރުން، އެ އިއުލާނުގައި ބުނެފައި ވަނީ، ހުއްދަ ނުހޯދާ އަރުވާ ޑްރޯންތަކާ މެދު އެ މިނިސްޓްރީގެ ފަރާތުން އަޅާ ފިޔަވަޅަކާ ގުޅިގެން އެ ތަކެއްޗަށް ލިބޭ ގެއްލުމެއްގެ ޒިންމާ ނުނަގާނެކަމަށެވެ.
