ސަރުކާރުން މި ގޮތަށް ނިންމަވާފައިވަނީ އިއްޔެ ބޭއްވި ވަޒީރުންގެ ބައްދަލުވުމުގައެވެ.
ރައީސް އޮފީހުން ބުނީ އިއްޔެ ބޭއްވި ވަޒީރުންގެ މަޖިލީހުގައި ރައީސް ޑރ. މުހައްމަދު މުއިއްޒު މިގޮތަށް ނިންމެވީ މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓް ހުށަހެޅުއްވި ކަރުދާހުގެ މައްޗަށް ވަޒީރުންގެ މެދުގައި މަޝްވަރާކުރެއްވުމަށްފަހުގައިކަމަށެވެ. އެގޮތުން ބޯހިޔާވަހިކަމުގެ މަޝްރޫއުތަކުގައި ދޮށީ އުމުރުގެ މީހުން ގެންގުޅޭ އާއިލާތަކަށް އިސްކަން ދިނުމަށް ރައީސް މުއިއްޒު ނިންމެވިކަމަށް ރައީސް އޮފީހުން ބުނެއެވެ.
މީގެއިތުރުން ދޮށީ އުމުރުގެ މީހުންނަށް ލިބިދޭންޖެހޭ ހައްގުތައް ރައްކާތެރިކޮށްދިނުމުގެ ގޮތުން، ޤާނޫނާއި ގަވާއިދުތަކަށް ގެންނަންޖެހޭ ބަދަލުތައް ގެންނެވުމަށްވސް ރައީސް މުއިއްޒު ވަނީ ނިންމަވާފައެވެ.
ދޮށީ އުމުރުގެ މީހުން ހިތްހަމަޖެހުމާއެކު އުމުރުގެ ބާކީ ދުވަސްތައް ހޭދަކުރެވޭނެ ފަދަ މާހައުލެއް ހޯދާދިނުމަށް ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ. މިގޮތުން އިސްރަށްވެހިންނަށް ހާއްސަކޮށް މާލޭގައި ވަނީ އިސްރަށްވެހިންގެ ނާދީއެއް މިމަހުގެ 17 ވަނަ ދުވަހު ހުޅުވާފައެވެ. އަދި ދޮށީ އުމުރުގެ މީހުންނަށް ހާއްސަ "އިސްރަށްވެހިންގެ ހިޔާވަހި" އައްޑޫ ސިޓީގައި ބިނާ ކުރުމަށް ރައީސް ޑރ. މުއިއްޒު އިއްޔެ ވަނީ ނިންމަވާފައެއެވެ.
