މާލެ-ވިލިމާލެ-ގުޅިފަޅު-ތިލަފުށި ބްރިޖަކުން ގުޅާލުމުގެ މަޝްރޫއުއަކީ ނިމުނު ސަރުކާރުން ކުރިއަށްގެންދަން ނިންމި އެންމެ ބޮޑު ޕްރޮޖެކްޓެވެ. ނަމަވެސް މަޝްރޫއުގެ އަމަލީ މަސައްކަތް ފެށީ ދައުރު ނިމެން އަހަރަކަށްވެފައިވަނިކޮށެވެ. އޭރު ސަރުކާރުން ބުނަމުންދިޔައީ ދައުރު ނިމުމުގެ ކުރިން ވިލިމާލެއާ ހަމައަށް ގުޅާލުމުގެ މަސައްކަތް މުޅިން ނިމި އަދި މުޅި މަޝްރޫއުގެވެސް ބޮޑު ބައެއް ނިންމާނެކަމަށެވެ.
ތިލަމާލެ ބްރިޖު އަޅަން ޖަހާފައިވާ ތަނބެއް.-- ފޮޓޯ: މުހައްމަދު ނާޝިދު
އާ ސަރުކާރު އައިސް އެންމެ އިސްކަން ދެއްވި އެއް މަސައްކަތަކީ މަޝްރޫއު ލަސްވާ ސަބަބުތައް ދެނެގަނެ، ބްރިޖް މަޝްރޫއުގެ މަސައްކަތް ހަލުވިކުރުމެވެ.
ރައީސް ޑރ. މުހައްމަދު މުއިއްޒު ދެ ފަހަރެއްގެ މަތިން ވަނީ ބްރިޖްގެ މަސައްކަތް ކުރިއަށްދާ ސައިޓަށް ވަޑައިގެން އަމަލީގޮތުން މަސައްކަތްތައް ބައްލަވާލައްވާފަ އެވެ. އަދި އެ ޕްރޮޖެކްޓް ކުރިއަށްގެންދާ އިންޑިއާގެ ކުންފުންޏާ އަދި ކަމާގުޅުންހުރި ފަރާތްތަކާ މަޝްވަރާކުރައްވާ ޕްރޮޖެކްޓްގެ މަސައްކަތްތައް ފަހަތަށްނުޖެހި އަވަސްކުރުމަށް ވަނީ އަންގަވާފަ އެވެ.
ބްރިޖުގެ ގުޅިފަޅު 1 އިން ގުޅިފަޅު 2 އަށް ގުޅާލަނީ ހައިވޭ މަގަކުންނެވެ. އެ މަގު ހެދުމަށް ބޭނުންވާ ސަރަހައްދު މިހާރު ވަނީ ހިއްކައި ނިމިފަ އެވެ. އަދި ތިލަފުށީގެ ބްރިޖު ސަރަހައްދަށް ބޭނުންވާ އިތުރު ބައެއް ވެސް އެ ސަރަހައްދުގެ ފަޅުން ވަނީ ހިއްކައި ނިމިފަ އެވެ.
ތިލަމާލެ ބްރިޖަކީ 500 މިލިއަން ޑޮލަރު (7.7 ބިލިއަން ރުފިޔާ)ގެ މަޝްރޫއެކެވެ. އެއީ އިންޑިއާގެ އެގްޒިމް ބޭންކްގެ ލައިން އޮފް ކްރެޑިޓްގެ ދަށުން ދޭ 400 މިލިއަން ޑޮލަރާއި އިންޑިއާގެ ސަރުކާރުން ދޭ ހިލޭ އެހީގެ ގޮތުގައި ލިބޭ 100 މިލިއަން ޑޮލަރެވެ.
