ފެނަކައިން ބުނީ ހދ. އަތޮޅުގެ ރަށްތަކުގައި ސްމާޓް މީޓަރު ހަރުކުރުމުގެ މަސައްކަތް ފެށުމުގެ ގޮތުން ރައްޔިތުންނާއި ރަށްރަށުގެ ކައުންސިލުތަކަށް މައުލޫމާތުދޭން ފަށާފައިވާ ކަމަށެވެ.
ގޭބީސީތަކުގައި ކަރަންޓު ބޭނުންކުރާ މިންވަރު ދެނެގަތުމަށް ފަސޭހައަކަށް ސްމާޓް މީޓަރު ޕްރޮޖެކްޓެއް ފަށާފައިވާ ކަމަށް ފެނަކައިން ބުނެފައި ވަނީ މިދިޔަ މަހުގެ 29 ވަނަ ދުވަހު އެވެ.
އެ ކުންފުނިން މި މަސައްކަތް ފުރަތަމަ ފަށާފައި ވަނީ ދ. އަތޮޅުގަ އެވެ. އެ އަތޮޅު ހުރިހާ ރަށެއްގައި މި މަސައްކަތް ކުރަމުން އަންނައިރު، ވަރަށް މަދު ގެއެއްގައި ނޫނީ ސްމާޓް މީޓަރު ހަރުކޮށް ވަނީ ނިންމާފަ އެވެ.
ދ. އަތޮޅުގައި މަސައްކަތް ނިންމާފައިވާ ނިސްބަތް:
- މީދޫ - 90 އިންސައްތަ
- ހުޅުދެލި - 85 އިންސައްތަ
- ރިނބުދޫ - 93 އިންސައްތަ
- މާއެނބޫދޫ - 91 އިންސައްތަ
- ބަނޑިދޫ - 86 އިންސައްތަ
- ކުޑަހުވަދޫ - 96 އިންސައްތަ
ފެނަކައިން ބުނި ގޮތުގައި އެ ކުންފުނީގެ ހިދުމަތުގެ ފެންވަރު ރަނގަޅުކޮށް، ރައްޔިތުންނަށް ލުއިފަސޭހަ ގޮތްތައް ހޯދައިދިނުމުގެ ގޮތުން ކޮންސިއުމަ ކވއ މީޓަރުތައް ސްމާޓް މީޓަރަށް ބަދަލުކޮށް، ރިމޯޓްކޮށް މީޓަ ރީޑިން ނެގުމާއި ޑާޓާ ކަލެކްޓް ކުރުމުގެ މަސައްކަތް އިތުރު އެހެން އަތޮޅުތަކުގައި ވެސް ކުރަމުން އަންނަ ކަމުގަ އެވެ.
ސްމާޓް މީޓަރު ހަރުކުރަމުން އަންނަ އަތޮޅުތައް:
- މ. އަތޮޅު
- ފ. އަތޮޅު
- ބ. އަތޮޅު
- ފުވައްމުލަކު ސިޓީ
ފެނަކައިގެ މެނޭޖިން ޑިރެކްޓަރު މުއާޒު މުހައްމަދު ރަޝީދު ވިދާޅުވެފައި ވަނީ ސްމާޓް މީޓަރާ އެކު ކޮންމެ ދުވަހަކު ވެސް ކަރަންޓު ހޭދަކުރެވޭ މިންވަރު އެނގި، ބިލު ކުޑަކުރަން އެހީއަކަށް ވާނެ ކަމަށެވެ.
މިދިޔަ ރޯދަ މަހު ކަރަންޓު ބިލުތައް ބޮޑުވެ، އެކަމުގެ ޝަކުވާތައް ބޮޑުވުމާ ގުޅިގެން ސަރުކާރުން ވަނީ އެ ބިލުތަކަށްް ޑިސްކައުންޓް ދިނުމަށް ނިންމާފަ އެވެ.
