ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން މޯލްޑިވް ގޭހުގެ މެނޭޖިންގ ޑިރެކްޓަރ އަބްދުﷲ މުހައްމަދު ވިދާޅުވީ، ލިކުއިޑް ޕެޓްރޯލިއަމް ގޭސް ނުވަތަ ކައްކާ ގޭސް ރާއްކާކުރެވޭ ކެޕޭސިޓީ ކުޑަކަމަށެވެ.
އަބްދުﷲ ވިދާޅުވީ، ކައްކާ ގޭސް ރައްކާކުރެވޭނެ ކެޕޭސިޓީ ހުރީ 35 ދުވަހަށްކަމަށާއި ކޮންމެ 35 ދުވަހަކުން އެ ގޭސް ގަތުމަކީ ޚަރަދުގެ ގޮތުންވެސް ބޮޑު ތަކުލީފެއްކަމަށެވެ.
އެގޮތުން ކައްކާ ގޭސް ރައްކާކުރެވޭނެ ކެޕޭސިޓީ އިތުރުކުރުމުގެ މަސައްކަތް ކުރަމުން އަންނަ ކަމަށާއި، މިއަހަރު ނިމުމުގެ ކުރިން ފަސް މަސް ދުވަހަށް ގޭސް ރައްކާކުރެވޭނެ ނިޒާމެއް ގާއިމްކުރެވޭނެ ކަމަށްވެސް އަބްދުﷲ ވިދާޅުވި އެވެ. އަދި އެކަމަށް ބޭނުންވާ ފައިސާވެސް މިހާރު ހަމަޖެހިފައިވާ ކަމަށް އޭނާ ވިދާޅުވި އެވެ.
އަބްދުﷲ ވިދާޅުވީ، އެ ކުންފުނީގައި ހުރި މައްސަލަތައް ހައްލުކުރުމުގެ ގޮތުން ތިނަދޫ ގޭސް ޕްލާންޓް އޮޕަރޭޝަނަށް ގެނައުމުގެ މަސައްކަތްތައްވެސް ކުރަމުން އަންނަކަމަށެވެ. އަދި އަމާޒަކީ އަންނަ އަހަރުގެ ތެރޭ އެތަން އޮޕަރޭޝަނަށް ގެނައުންކަމަށާއި، އޭރުން ދެކުނުގެ އަތޮޅުތަކަށް ކައްކާގޭސް ފޯރުކޮށްދެވޭ އަގުހެޔޮވެ، ހިދުމަތް ދިނުމުގައިވެސް އަވަސްކަމެއް ލިބިގެންދާނެކަމަށެވެ.
ހަމައެހެންމެ ހުޅުމާލެ ދެވަނަ ފިޔަވަހީގައި އިތުރު ޑިސްޓްރިއުބިޝަން ސެންޓަރެއް ގާއިމްކުރުމަށް ބިން ހަމަޖެހިފައިވާކަންވެސް އޭނާ ފާހަގަކުރެއްވި އެވެ. މީގެ އިތުރުން އެ ކުންފުނީގެ އޮފީސް އިމާރާތެއް އެޅުމަށްޓަކައި ހުޅުމާލެ ފުރަތަމަ ފިޔަވަހިން ބިމެއް ހަމަޖެހިފައިވާކަންވެސް އޭނާ ފާހަގަކުރެއްވި އެވެ.
