އަންނަ މަހު ޖަރުމަނުގައި އޮންނަ ޔޫރޯ މުބާރާތް ވެގެންދާނީ، އުމުރުން 39 އަހަރުގެ ރޮނާލްޑީގެ 11 ވަނަ ބޮޑު ބައިނަލްއަގްވާމީ މުބާރާތަށެވެ.
ސައުދީ އަރަބިއްޔާގެ އަލް ނަސްރުގެ ފޯވާޑަކީ މިހާރުވެސް ބައިނަލްއަގްވާމީ ފުޓްބޯޅަ ތާރީހުގައި އެންމެ ގިނަ މެޗު ކުޅެދިން ކުޅުންތެރިޔާއެވެ. އޭނާ ވަނީ ޕޯޗުގަލްއަށް 206 މެޗު ކުޅެ 128 ގޯލު ޖަހައިދީފައެވެ.
އަންނަ މަހު ޖަރުމަނުގައި ބާއްވާ މުބާރާތުގައި ޕޯޗުގަލްގެ ކޯޗު ރޮބާޓޯ މާޓިނޭޒް ވަނީ އޭނާގެ 26 ކުޅުންތެރިންގެ ސްކޮޑުގައި ފޯވާޑް ހަތް ކުޅުންތެރިންގެ ތެރޭގައި ރޮނާލްޑޯ ހިމަނާފައެވެ. ނޫސްވެރިންގެ ބައްދަލުވުމެއްގައި މާޓިނޭޒް ބުނީ ރޮނާލްޑޯ ހިމެނީ، ރޮނާލްޑޯއަކީ ގޯލް ކުރިމަތީގައި ބޭނުންވާ ކޮލިޓީގައި އަދިވެސް ކުޅެވޭނެ ކުޅުންތެރިއެއްކަމުގައި އޭނާ ވާތީ ކަމަށެވެ.
ޔޫރޯ މުބާރާތުގައި ފުރަތަމަ ފަހަރަށް ރޮނާލްޑޯ ކުޅުނީ މީގެ 20 އަހަރު ކުރިންނެވެ. ޔޫރޯ 2004 ގައި ޕޯޗުގަލް އަމިއްލަ ދަނޑުގައި ފައިނަލަށް ދަތުރުކުރި ނަމަވެސް ގްރީސް އަތުން އެ ފަހަރު ބަލިވި އެވެ. އެކަމަކު ރޮނާލްޑޯގެ މޮޅު ކުޅުމާއެކު 2016 ވަނަ އަހަރު ޕޯޗުގަލްއިން އެ މުބާރާތް ކާމިޔާބު ކުރިއެވެ. އަދި އޭގެ ފަހުން ޔުއެފާ ނޭޝަންސް ލީގުވެސް ޕޯޗުގަލްއިން ކާމިޔާބު ކުރީ ރޮނާލްޑޯގެ ބޮޑު ހިއްސާއަކާއެކުއެވެ.
