މަރު ކޮމިޝަންގެ ތަހުގީގުތަކުގެ ރިޕޯޓުތަކާއި ހޯދުންތައް ރައީސް އޮފީހުގެ ހުއްދަ ނެތި އެއްވެސް ބަޔަކާ ހިއްސާ ނުކުރުމަށް އެ އޮފީހުން މީގެ ކުރިން ވަނީ އަންގާފައެވެ. އެއާއި އެކު ބައެއް މަދަނީ ޖަމިއްޔާތަކުން ވަނީ އެ ނިންމުންތައް ހާމަކުރުމަށް ގޮވާލާ ބަޔާނެއް ނެރެފައެވެ. އަދި މަރު ކޮމިޝަނުންވެސް ވަނީ ތަހުގީގުގައި ކޮންމެހެން ރައްކާތެރިކުރަންޖެހޭ މައުލޫމާތުތައް އުނިކުރުމަށްފަހު ހުލާސާ ތަހުގީގު ރިޕޯޓްތައް އާއިލާތަކާއި ހިއްސާކުރަން ކުރަން ރައީސް އޮފީހުގައި އެދޭނަކަމަށް ބުނެފައެވެ.
މިިދިޔަ ސަރުކާރުގައި އުފެއްދި ކޮމިޝަންގެ ދައުރު މިމަހުގެ ނިޔަލަށް ދަންމާލުމަށް ރައީސް މުއިއްޒު ވަނީ ނިންމަވާފައެވެ. އެއާއި އެކު އެ ކޮމިޝަނުން ކުރި ތަހުގީގުގެ ރިޕޯޓްތައް ނިންމާ ރައީސް އޮފީހާ ހަވާލުކުރުމަށް ވެސް ކޮމިޝަން ތައްޔާރުވެފައިވާ ކަމަށް އެ ކޮމިޝަނުން ވަނީ ބުނެފައެވެ.
ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވީ ކޮމިޝަންގެ ރިޕޯޓުތައް ލިބުމުން އޭގައިވާ މައުލުމާތުތައް ސަރުކާރުން ހާމަކުރާނެކަމަށެވެ.
މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ތަހުގީގު ކުރުމަށް އެކުލަވާލި ކޮމިޝަނުން ވަނީ ނޫސްވެރިޔާ އަހުމަދު ރިލްވާން އަބްދުﷲ އަދި ބްލޮގަރު ޔާމީން ރަޝީދުގެ މައްސަލަ ތަހުގީގުކޮށްފައެވެ.
ކޮމިޝަނުން ބެލި ނޫސްވެރިޔާ އަހްމަދު ރިލްވާންގެ މައްސަލާގައި މިދިޔަ ވެރިކަމުގައި 3 މީހަކު ހައްޔަރުކުރިއެވެ. އެހެންނަމަވެސް މަދަނީ މިންގަނޑުން މައްސަލަތައް ކުރިއަށް ނުގެންދެވޭނެކަމަށް ކޯޓުން ކަނޑައެޅުމުން ވަނީ އެމީހުން މިނިވަންވެފައެވެ.
