ބީއެމްއެލްގެ މާސްޓަ ކާޑު ބޭނުން ކުރާ ކަސްޓަމަރުންނަށް ހުޅުވާލި ހާއްސަ ޕްރޮމޯޝަނުގެ އިނާމު ލިބުނު ފަރާތަކީ އައްޑޫ މަރަދޫ، މުހައްމަދު މުހުދިން އެވެ. އުމުރުން 8-12 އަހަރާ ދެމެދުގެ ކުއްޖަކު ފައިނަލް މެޗުގެ މެސްކޮޓުގެ ދަށުން ދަނޑަށް ގެންދިއުމުގެ ފުރުސަތު ލިބުމުން އެ ފުރުސަތު އޭނާ ދީފައި ވަނީ ކޮއްކޮ، އިބްރާހިމް ޒައިން ޒިޔާދެވެ.
މި ޕްރޮމޯޝަނުގެ ދަށުން ލިބޭ އިނާމުގެ ގޮތުގައި މުހުދިން އާއި ޒާއިންއަށް ހުރިހާ ހަރަދަކާ އެކު ލަންޑަންގައި ހަތަރު ދުވަހަށް ހުރުމުގެ ފުރުސަތު ލިބޭނެ އެވެ. ބީއެމްއެލުން ބުނީ ލަންޑަން ދެކޮޅު ޓިކެޓް، އެކޮމޮޑޭޝަން، ޔޫއެފާ ޗެމްޕިއަންސް ލީގް ފައިނަލް މެޗުގެ ދެކޮޅު ޓިކެޓް، ޕޮކެޓް މަނީ އަދި ވެލްކަމް ގިފްޓެއް ލިބޭނެ ކަމަށެވެ.
މި ޕްރޮމޯޝަން ކުރިއަށް ދިޔައީ މާސްޓާކާޑުގެ ޑެބިޓް އާއި ކްރެޑިޓް އަދި ޕްރިޕެއިޑް ކާޑު ބޭނުންކޮށްގެން ރާއްޖެ އާއި ރާއްޖޭން ބޭރުގައި ކުރާ ހުރިހާ މުއާމަލާތްތަކެއް ހިމެނިގެން ކަމަށް ބީއެމްއެލުން ބުނެ އެވެ.
މާސްޓަ ކާޑަކީ ޔޫއެފާ ޗެމްޕިއަންސް ލީގުގެ އޮފިޝަލް ސްޕޮންސަރެވެ. ބީއެމްއެލްއަކީ ރާއްޖޭގައި މާސްޓަކާޑުގެ ޕްރިންސިޕަލް މެންބަރެކެވެ. ބީއެމްއެލުން އަންނަނީ ރާއްޖޭގައި މާސްޓަ ކާޑު ޑެބިޓް، ކްރެޑިޓް އަދި ޕްރީޕެއިޑް ކާޑު ދޫކުރަމުންނެވެ.
