އައިޔޫއެމްއިން ބުނީ އަންނަ ހޮނިހިރު ދުވަހު އޮންނަ މި ބައްދަލުވުން ރާއްޖޭގައި ބޭއްވުމުގެ މަސައްކަތް ވަރަށް ބާރަށް ކުރިއަށްދާ ކަމަށެވެ. އެ ޔުނިވާސިޓީގެ ހޯލުގައި ބާއްވާ މި ހާއްސަ ހަރަކާތުގައި މެލޭޝިއާ، އިންޑޮނޭޝިއާ، ތައިލެންޑް، ބުރުނާއީ ދާރުއްސަލާމް އަދި އައިޔޫއެމްއިން 60 އަށް ވުރެ ގިނަ އިސް އޮފިޝަލުން ބައިވެރިވެވަޑައިގަންނަވާނެ އެވެ. ރާއްޖޭން ބޭރުގެ ގިނަ އަދަދެއްގެ ޔުނިވާސިޓީތަކެއްގެ އިސްވެރިންގެ ބައްދަލުވުމެއް ބޭއްވުމަކީ ރާއްޖެއަށާއި އެ ޔުނިވާސިޓީއަށް ލިބޭ ވަރަށް ބޮޑު ޝަރަފެއް ކަމަށް އައިޔޫއެމްއިން ބުނެ އެވެ.
އައިޔޫއެމްއިން ބުނެފައި ވަނީ ހޮނިހިރު ދުވަހު އޮންނަ ޔުނިވާސިޓީ ބައްދަލުވުމުގެ އިތުރުން އެ ދުވަހު ހެނދުނު އިންޓަނޭޝަނަލް ސެމިނާއެއް ބޭއްވުމަށް ހަމަޖެހިފައިވާ ކަމަށެވެ. މި ސެމިނާގެ މައުލޫއެއްގެ ގޮތުގައި ހަމަޖެހިފައި ވަނީ ޝާމިލުކޮށްގެން އުނގަންނައިދިނުމުގައި އޭޝިއާގެ މަތީ ތައުލީމުގެ ދާއިރާއަށް ދިމާވެފައިވާ ދަތިތަކާއި ފުރުސަތުތައް ކަމަށް އެ ޔުނިވާސިޓީން ބުނެ އެވެ. މި ސެމިނާގައި މެލޭޝިއާ، އިންޑޮނޭޝިއާ، ތައިލެންޑް އަދި ބުރުނާއީ ދާރުއްސަލާމުން ބައިވެރިވެވަޑައިގަންނަވާ ބޭފުޅުން ކަރުދާސް ހުށަހަޅާނެ އެވެ. މީގެ އިތުރުން މި ބައްދަލުވުމުގައި ބައިވެރިވާ ޔުނިވާސިޓީތަކުގެ މެދުގައި ގުޅިގެން މަސައްކަތްކުރުމުގެ ފަހުމުނާމާތަކުގައި ސޮއިކުރުން ވެސް އެ ދުވަހު އޮންނާނެ ކަމަށް އައިޔޫއެމްއިން ބުނެ އެވެ.
އައިޔޫއެމްއިން ބުނި ގޮތުގައި ބައިނަލްއަގުވާމީ ސެމިނާ އާއި އަހަރީ ބައްދަލުވުމަށް ވަޑައިގަންނަވާ ބޭރުގެ ޔުނިވާސިޓީތަކުގެ އިސް މަންދޫބުން މިހާރު ވަނީ މާލެ ވަޑައިގަންނަވަން ފައްޓަވާފައި ކަމުގަ އެވެ. އޭއައިޔޫއޭއަކީ އައިޔޫއެމްގެ އިތުރުން މެލޭޝިއާ، އިންޑޮނޭޝިއާ، ތައިލެންޑް، ބުރުނާއީ ދާރުއްސަލާމް، ޕިލިޕީންސް އަދި ކެމްބޯޑިއާގެ 80 އަށް ވުރެ ގިނަ ޔުނިވާސިޓީތަކާއި މަތީ ތައުލީމު ފޯރުކޮށްދޭ މުއްސަސާތައް ހިމެނޭ ބައިނަލްއަގުވާމީ ޖަމިއްޔާއެކެވެ.
