ބްރެޒިލްގެ ދެކުނުގެ ބައެއް ސްޓޭޓްތަކަށް ހަފްތާތަކެއްވަންދެން މެދު ނުކެނޑި ވާރޭވެހި، ފެންބޮޑުވުމުގެ ސަބަނުން ލިބިފައިވާ ގެއްލުންތަކަށް އެހީތެރިވުމަށް ކުޅޭ ޗެރިޓީ މެޗު އޮންނާނީ އާދިއްތަ ދުވަހުއެވެ. ފެންބޮޑުވުމުގެ ސަބަބުން މިހާތަނަށް 160 މީހުން މަރުވެފައިވާ ކަމަށް ރިޕޯޓްކޮށްފައިވާއިރު، ދެކުނުގެ ބައެއް ސްޓޭޓްތަކުގެ 90 އިންސައްތަވަނީ ފެނު އަޑީގައެވެ.
ހާލުގައި ޖެހިފައިވާ މީހުންނަށް އެހީވުމަށް ކުޅޭ ޗެރިޓީ މެޗުގައި ވޯލްޑް ކަޕް ކާމިޔާބުކުރި ރޮނާލްޑީނިއޯ، ކާފޫ އަދި ބެބެޓޯ ހިމެނެއެވެ. ރިއޯ ޑި ޖެނީރޯގެ އައިކޮނިކް މަރަކާނާ ސްޓޭޑިއަމްގައި ކުޅުމަށް ހަމަޖެހިފައިވާ މި މެޗުގައި މިހާރުގެ ފިރިހެން ގައުމީ ޓީމުގެ ކޯޗު ޑޮރިވަލް ޖޫނިއާ އާއި އަންހެން ޓީމުގެ ޑިފެންޑަރު ތަމިރޭސް ވެސް ކުޅޭނެ އެވެ.
މި މެޗުގެ ޓިކެޓް ގާތްގަނޑަކަށް ހަ ޑޮލަރުން ފެށޭއިރު، ވިއްކައިގެން ލިބޭ ފައިސާ އާއި ޓީވީ ބްރޯޑްކާސްޓުން ލިބޭ ފައިސާ ހަދިޔާ ކުރާނީ ފެންބޮޑުވުމުގެ ސަބަބުން ހާލުގައި ޖެހިފައިވާ މީހުންނަށެވެ.
