އެ ވުޒާރާއިން ކުރަމުން އަންނަ މަސައްކަތްތައް ހާމަކުރުމަށް މިއަދު ބޭއްވި ނޫސްވެރިންގެ ބައްދަލުވުމުއްގައި ޑިރެކްޓާ ޖެނެރަލް އާތިކާ އިބްރާހިމް ވިދާޅުވީ މިފަހަރުގެ މިނިވަން ދުވަސް ވަރަށް ކުލަގަދަކޮށް ފާހަގަކުރަން ނިންމާފައިވާކަމަށެވެ. އަދި މިނިވަންދުވަސް ފާހަގަކުރުމަށް ބާއްވާ ރަސްމީ ހަރަކާތްތަކުގައި އާއްމުންނަށްވެސް ބައިވެރިވެވޭނެ ގިނ ހަރަކާތްތަކެއްވެސް އޮންނާނެކަން އޭނާ ފާހަގަ ކުރެއްވިއެވެ.
މިދިޔަ އަހަރުގެ މިނިވަންދުވަސް ފާހަގަކުރަން ބޭއްވި ހެވިކަމުގެ ކުޅިވަރުތަކުގެ ތެރެއިން
މިއަހަރުގެ މިނިވަން ދުވަސް ފާހަގަކުރުމަށް ހިންގާ ހަރަކާތްތައް އޮންނާނީ ޖުލައި މަހުގެ 24 އިން ފެށިގެން 31 ގެ ނިޔަލަށެވެ. މިއަހަރުވެސް ރަސްމީ ހަރަކާތްތަކުގެ ގޮތުގައި ދިދަ ނެގުމާއި ރައީސްގެ ދެ ކަނބަލުން ދެއްވާ ރަސްމީ ޖަފަތާއި ފުޅަނދުބުރާއި ދަނޑުގައި ބާއްވާ ކުޅިވަރުތައް އޮންނާނެއެވެ. މީގެއިތުރުން މިނިވަން އުފާ ކާނިވާ އަދި ޑްރޯން ޝޯ މިއަހަރުވެސް އޮންނާނެކަމަށް އެ ވުޒާރާއިން ބުނެއެވެ.
މިިދިޔަ އަހަރުގެ މިނިވަންދުވަސް ފާހަގަކުރަން ބޭއްވި މިނިވަން އުފާ ކާނިވާގެ ތެރެއިން
ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިން މިފަހަރުގެ ދިދަ ނަގުމުގެ ރަަސްމިއްޔާތު އޮންނާނީ ދިދަ އަށް އިއްޒަތް ދިނުމަށް ދިދަ އާކުރުމުގެ ހަރަކާތެއްގެ ގޮތުގައެވެ. އާއްމުންނަށްވެސް ހުޅުވާލައިގެން ބާއްވާ މި ހަރަކާތުގެ ތެރޭގައި ދިދަ ވިހުރުމުގެ ހަރަކާތެއްވެސް ކުރިޔަށް ގެންދިޔުމަށް ވަނީ ނިންމާފައެވެ.
މިދިޔަ އަހަރުގެ މިނިވަންދުވަސް ފާހަގަކުރަން ދަނޑުގައި ބޭއްވި ކުޅިވަރު ހަރަކާތުގެ ތެރެއިން
މިއަހަރު މިނިވަންދުވަހާއި ގުޅުވައިގެން ހިންގާ ހަރަކާތްތައް
- ފަންނާނުންގެ ޝޯ
- ހަވާ އެރުވުން
- ފިލްމު ފެސްޓިވަލެއް
- ސްކޫލު ކުދިންނަށް ހާއްސަ މަޒުމޫނު ލިޔުމުގެ މުބާރާތަކާއި ކުރެހުމުގެ މުބާރާތެއް
- ސްކޫލުތަކުގައި ދުވަހަށް ހާއްސަ އެސެމްބްލީ
- ޑޮކިޔު ޑްރާމާ އެއް
- މިނިވަން ދުވުން
- ފިޔަވަތީގެ ކުދިންނަށް ހަވީރަކާއި އިސް ރަށްވެހިންގެ ހަވީރެއް
- އެމްބަސީތަކާ، ރާއްޖޭން ބޭރުގައިވެސް ހަރަކާތްތައް
- ސަގާފީ ޝޯ
- މިނިވަން ސޭލުގެ ނަމުގައި ސޭލެއް
- ފުޑް ފެސްޓިވަލެއް
މިނިވަންދުވަސް ފާހަގަކުރުމަށް ފުރަތަމަ ފަހަރަށް ބޭއްވި ޑްރޯން ޝޯގެ ތެރެއިން
މިއަހަރު ފާހަގަކުރާނީ ރާއްޖޭގެ 59 މިނިވަން ދުވަހެވެ.
