ބަނޑޭރިކޮށީގެ އެޕާޓްމެންޓެއްގައި މަރުވެފައި އޮއްވާ ފެނުނީ ގދ ހޯޑެއްދޫ ވިލިގިނލީގޭ އުމުރުން 30 އަހަރުގެ ހައްމާދު ސައީދުއެވެ. މީހުން ދިރުނުޅޭ އެޕާޓްމެންޓެއްގެ ތެރޭގައި މީނާ މަރުވެފައި އޮއްވާ ފެނުނީ މިމަހުގެ 13 ވަނަ ދުވަހުގެ ހަވީރުގެ ވަގުތެއްގައެވެ. މީނާ ފެނުނު އިރުވެސް ހަށިގަނޑު ވަރަށް ބޮޑަށް ވަނީ ގޯސްވެފައެވެ.
މި ޒުވާނާގެ މަރުގެ ހަގީގަތް ދެނެގަތުމަށް ޕޯސްޓްމޯޓަމް ހެދުމަށް އިންޑިއާއަށް ފޮނުވާލީ މިމަހުގެ 21 ވަނަދުވަހުއެވެ. ޕޯސްޓް މޯޓަމަށްް ފަހު އޭނާގެ ހަށިގަނޑު މާލެ ގެނެސް ރޭ ވަނީ ހުޅުމާލެ އާ ސަހަރާގައި ވަޅުލާފައެވެ.
މި ޒުވާނާގެ މަރާ ގުޅިގެން ހެދި ޕޯސްމޯޓަމުން ނުކުތް ނަތީޖާއެއް އަދި ފުލުހުން ހާމައެއް ނުކުރެއެވެ.
މިމަހުގެ ތެރޭގައި މާލޭއިން މަރުވެފައި އޮތްވާ ދެ ޒުވާނުން ވަނީ ފެނިފައެވެ. މި ޒުވާނުން ފެނުނު ފަހުން ހޯމް މިނިސްޓްރީން ވަނީ ނުރައްކާތެރި މަސްތުވާތަކެތީގެ ބާވަތެއްކަމަށްވާ " ޗައިނާ ވައިޓް" ދައުރުވަމުންދާކަމަށް ބުނެ އެކަމަށް ސަމާލުވުމަށް އާއްމުންނަށް ގޮވާލާފައެވެ.