މިއަދު ބޭއްވި ނޫސްވެރިންގެ ބައްދަލުވުމުގައި އެގްރިކަލްޗަރ މިނިސްޓްރީގެ ސްޓޭޓް މިނިސްޓަރު މަރިޔަމް ވިޝާމާ ވިދާޅުވީ ރާއްޖޭގެ ދަނޑުވެރިކަމުގެ ހާލަތު ދެނެގަތުމަށްޓަކައި ފުރަތަމަ ފަހަރަށް މިއަހަރުގެ ޖުލައި މަހުގައި ރާއްޖޭގައި "ސެންސަސް" އެއް ކުރިއަށްގެންދާނެ ކަމަށެވެ.
ވިޝާމާ ވިދާޅުވީ، އެ މިނިސްޓްރީން މި މަސައްކަތް ކުރިއަށްގެންދާނީ މޯލްޑިވްސް ބިއުރޯ އޮފް ސްޓެޓިސްޓިކްގެ އެހީގައި ކަމަށާއި، މިހާރު ސެންސަސްގެ ޕްރީ ޓެސްޓިންއެއް ބ. ގޮއިދޫއާއި ބ. އަންހެންފުށީ ގައި ކުރިއަށްގެންދެވިފައިވާ ކަމަށެވެ. އަދި މި މަސައްކަތުގެ ދަށުން މިހާރު ސުވާލު ކަރުދާސް ތައްޔާރުކުރުމައި ރާއްޖޭގައި ތިބި ދަނޑުވެރިންގެ އަދަދު ހޯދަމުންދާ ކަމަަށެވެ.
އަދި މީގެއިތުރުން، އެ މިނިސްޓްރީން ކުރިއަށްގެންދަން ރާވާފައިވާ ވާޓިކަލް ފާމިން ޕައިލެޓް ޕްރޮޖެކްޓެއް ހދ. ހަނިމާދޫގައި ހިންގި ކަމަށް ބުނެފައި ވެއެވެ. އަދި މި މަސައްކަތުގެ ތެރެއިން ބައެއް ބާވަތްތަކުގެ ތަރުކާރީ ނުވަަތަ މޭވާގެ ދެވަނަ ބެޗެއް އިންދިފައިވާ ކަމަށާއި، މިއީ ބިން ކުދި ރަށްތަކުގައި ދަނޑުވެރިކަން ކުރުމަށް އެންމެ އެކަށީގެންވާ ގޮތް ކަމަށް ވިޝާމާ ފާހަގަކުރި އެވެ.
މީގެ އިތުރަށްވެސް މިނިސްޓްރީން ދަނޑުވެރި ނަފާ ލޯންގެ ދަށުން ދަނޑުވެރިންނަށް މާލީ އެހީ ދެމުންދާ ކަމަށާއި އެލޯން ދޫކުރަމުންދަނީ ކުދި ޖަނަވާރު އާލާކުރުން ފަދަ މަސައްކަތްތަކަށް ކަމަށް މައުލޫމާތު ދީފައި ވެއެވެ. ރަހުނަކާއި ނުލާ ދޫކުރާ މި ލޯންތަކުގެ ދަށުން މިހާތަނަށް 13 މިލިއަން 2 ލައްކަ ރުފިޔާގެ ލޯނު އަމިއްލަ ފަރާތްތަކާއި ޕްރައިވެޓް ކުންފުނިތަކަށް ދޫކޮށްފައި ވެއެވެ.
މިނިސްޓްރީގެ ލިޔުންތަކުން ފެންނަގޮތުން މިވަގުތު ރާއްޖޭގައި 7،600 ދަނޑުވެރިން ތިބި އިރު އޭގެ ތެރެއިން 55 ޕަސެންޓަކީ އަންހެނުންނެވެ.
