ޖަރުމަނުން އިސްނަގައިން އދ.ގެ އާއްމު މަޖިލީހަށް ހުށަހެޅި މި ގަރާރުގައި، ކޮންމެ އަހަރެއްގެ ވެސް 11 ޖުލައި އަކީ ބައިނަލްއަގުވާމީ ގޮތުން 1995 ވަނަ އަހަރު ސްރޭބްރެނީސާގައި ހިނގައިދިޔަ ޖެނޮސައިޑް ފާހަގަކުރުމަށް ވަނީ ގޮވާލައިފަ އެވެ.
އިރުމަތީ ޔޫރަޕުގައި 1992 ވަނަ އަހަރު ފެށި ބޮސްނިއާ ހަނގުރާމައިގައި ހިންގި އެ ގަތުލުއާންމާ ގުޅޭ އެ ގަރާރު ފާސް ކުރީ 84 ގައުމުގެ ތާއީދާއެކު އެވެ. ގަރާރު ފާސް ކުރުމާ ދެކޮޅަށް ވޯޓު ދިނީ އެންމެ 19 ގައުމެވެ. ނަމަވެސް އެއްވެސް ކޮޅަކަށް ވޯޓުނުލާ 68 ގައުމެއް ތިއްބެވެ.
އެ ގަރާރަށް ވޯޓަށް ހުޅުވާލުމުން، ވޯޓުގައި ބައިވެރިވި ނަމަވެސް ރާއްޖެއިން އެއްވެސް ކޮޅަކަށް ވޯޓެއް ނުދެ އެވެ. ރާއްޖެއިންވީ "އެބްސްޓެއިން" އެވެ.
އޯއައިސީގެ ގައުމުތަކުގެ އިތުރުން މި ގަރާރާ ދެކޮޅަށް ޗައިނާއިން ވޯޓުލާފައިވެއެވެ. މީގެ އިތުރުން އިންޑިޔާ، ލަންކާ، ނޭޕާލް، ބޫޓާން އަދި އެފްރިކާ ބައްރުގެ ގިނަ ގައުމުތަކުން ވެސް ވޯޓު ލާފައިވަނީ ދިވެހިރާއްޖެއާ އެއްގޮތަށެވެ.
އދ. ގައި ނެގި މިފަދަ މުހިންމު ވޯޓެއްގައި ރާއްޖޭން ވަކި ކޮޅަކަށް ވޯޓު ނުދިން ސަބަބު އެނގިވަޑައިގަންނަވާ ސަރުކާރުގެ އިސް އޮފިޝަލަކު ވިދާޅުވި ގޮތުގައި ރާއްޖެއިން ވަކި ކޮޅަކަށް ވޯޓު ދީފައިވަނީ މި ގަރާރުގައި ހިމެނޭ ގައުމުތަކުން ވެސް މި ގަރާރާ ގުޅިގެން އިއްތިފާގު ވެފައި ނުވުމާ އެކު މި ގަރާރާ ގުޅިގެން އދ.ގެ ކޯޓުން ނިންމާފައި އޮތް މައްސަލައެއްގައި އިތުރު ނުތަނަވަސްކަމެއް އުފެދެން ބޭނުންނުވާތީ އެވެ.
އޭނާ ވިދާޅުވީ، އިސްލާމީ ވަރަށް ގިނަ ގައުމުތަކުން ވެސް މި ގަރާރާ ގުޅިގެން ވަކިކޮޅަކަށް ވޯޓު ދީފައިނުވަނީ، މި ކަމުގައި މިހާރު އުފެދިފައިވާ ސަރަހައްދީ ވާދަވެރިކަމުގެ ތެރެއަށް ވަދެ ބަސްބުނަން ބޭނުންނުވާތީ ކަމަށެވެ.
އޯއައިސީ ގިނަ ގައުމުތަކުން އެ ގަރާރު ފާސްކުރަން ވޯޓު ނުދިން ނަމަވެސް އެ ޖަލްސާގައި ވަނީ އެ ގަރާރު ފާސްކޮށްފަ އެެވެ.
އެ ގަރާރު ފާސްވުމާ އެކު ކޮންމެ އަހަރެއްގެ ވެސް ޖުލައި 11، ސްރޭބްރޭނީޓްސްއާގެ ގަތުލުއާއްމު ހަނދާން ކުރަން ހާއްސަ ދުވަހެއްގެ ގޮތުގައި ފާހަގަކުރަން އދ. އިން ވަނީ ބަލައިގަނެފަ އެވެ. މިއަހަރުން ފެށިގެން މި ދުވަސް އެ ގަރާރާ އެއްކޮޅަށް ވޯޓު ދިން ގައުމުތަކުގައި ފާހަގަކުރާނެ އެވެ.
11 ޖުލައި 1995 ގައި ބޮސްނިއާގެ ސްރޭބްރޭނީޓްސްއާގައި 8،372 މުސްލިމުން މަރައިލި އެވެ. އެކަން ކުރީ 1992 ވަނަ އަހަރު ފެށި ބޮސްނިއާ ހަނގުރާމައިގެ ތެރެެއިން ބޮސްނިއާ ސާބުންގެ މިލިޓަރީ ގްރޫޕަކުންނެވެ. އެ ޖަރީމާއަކީ ގަތުލުއާއްމެއް ކަމަށް އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން ވަނީ ނިންމައިފަ އެވެ.
