ދިވެހިރާއްޖޭގެ އަޑުގެ ސެނަކޯ މާލަމުގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު ވަނީ ވޭތުވެދިޔަ 6 މަސްދުވަހު އެ ވުޒާރާއިން ކުރައްވާފައިވާ މަސައްކަތްތައް ހިއްސާކުރައްވާފަ އެވެ.
ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު މާރިޔާ ވިދާޅުވީ ރާއްޖޭގައި މަތީތައުލީމާއި ތަމްރީން ދޭ ޕްރޮގްރާމްތައް އިންޓަނޭޝަނަލައިޒްކޮށް ބޭރުގައި ކިޔަވާކުދިން ރާއްޖޭގެ މަރުކަޒުތަކުގައި ކިޔެވުމުގެ ފުރުސަތު ރައީސް މުއިއްޒުގެ ވެރިކަމުގެ މި ދައުރުގައި ހުޅުވާލެވިގެންދާނެެކަމަށެވެ.
މިނިސްޓަރު ވަނީ އެ މަސައްކަތަކީ ރައީސް މުއިއްޒުގެ ވިޒިޓާ އިކޮނޮމީގެ ސިޔާސަތުގެ ދަށުން ހިންގަން ކަނޑައަޅާފައިވާ ޕްރޮގްރާމެއްކަަމަށް ވިދާޅުވެފަ އެވެ. އަދި މިނިސްޓްރީގެ ތަސައްވަރަކީ މަތީ ތައުލީމު ހާސިލް ކުރާ އާބާދީގެ މަދުވެގެން 2 އިންސައްތަ ދަރިވަރުންނަކީ އެހެން ގައުމުތަކުން ދިވެހި ރާއްޖެއަށް މަތީ ތައުލީމު ހާސިލްކުރުމަށް އަންނަ ދަރިވަރުންނަށް ހެދުންކަމަށް މާރިޔާ ވިދާޅުވި އެވެ.
މީގެ އިތުރުން މިނިސްޓަރު ވަނީ ކުރިއަށް ހުރި ފަސް އަހަރު ކުރަން ހުރި މުހިއްމު މަސައްކަތްތަކަށް އަލިއަޅުއްވާލާފަ އެވެ. އެގޮތުން ރާއްޖޭގައި ކޮންމެ އަތޮޅެއްގައި މަތީ ތައުލީމާއި ތަމްރީން ދޭ މަރުކަޒާއި ދަނާލްތައް ގާއިމކުރުން ހިމެނޭއިރު އޭގެ ތެރޭގައި މޯލްޑިވްސް ނޭޝަނަލް ޔުނިވާސިޓީ، އިސްލާމިކް ޔުނިވާސީޓީ، މޯލްޑިވްސް ޕޮލިޓެކްނިކް ގުޅިގެން އެ ސަރަހައްދަށް ފައިދާހުރި ހާއްސަ ދާއިރާތަކަށް އިސްކަންދީގެން ތަމްރީންދޭ މަރުކަޒުތައް ގާއިމްކުރެވިގެންދާނެ ކަމަށް މިނިސްޓަރު ވިދާޅުވި އެވެ.
އަދި މި މަރުކަޒުތައް އެކި އެކި ސިނާއަތްތަަކަށް ހާއްސަ ކުރެވޭނެކަމަށާއި އެކި އެކި ބަސް ދަސްކޮށްދޭ ތަންތަންވެސް ގާއިމްކުރެވިގެންދާނެކަމަށް މިނިސްޓަރު މާރިޔާ ވިދާޅުވި އެވެ.
މީގެ އިތުރުން މަތީ ތައުލީމް ހާސިލް ކުރުމަށް އެދޭ ދަރިވަރުންގެ މާލީ އެހީތެރިކަމާއި ސްކޮލަރޝިޕްތައް މި 5 އަހަރުގެ ތެރޭގައި ތަނަވަސްކޮށްދިނުމަކީ ސަރުކާރުގެ އަމާޒުކަމަށެވެ. އެކަން އެގޮތުގައި ކުރިއަށް ގެންދިޔުމަށްޓަކައި ޕްރައިވެޓް ކޮލެޖްތަކާއި ޔުނިވަރސީޓީތަކާ ގުޅިގެން މަސައްކަތްކޮށް ހަޔަރ އެޑިއުކޭޝަން އިންސްޓިޓިއުޝަންތަކުގެ ފެންވަރު ރަނގަޅުކުރުމަށް މަސައްކަތް ކުރައްވާނެކަމަށެވެ.
