ކަސްޓަމްސްއިން ނެރެފައިވާ ތަފާސްހިސާބުތަކަށް ބަލާއިރު،
- މިދިޔަ މަހު އެކްސްޕޯޓް ކޮށްފައި ވަނީ 151 މިލިއަން ރުފިޔާގެ މުދާ
- މިއީ 22 އިންސައްތައިގެ ދަށްވުމެއް
އެކްސްޕޯޓް ކުރެވުނު މުދަލުގެ އަގު ދަށްވި ނަމަވެސް 2023 ވަނަ އަހަރުގެ އެޕްރީލް މަހާ އަޅާބަލާއިރު، ފާއިތުވެދިޔަ މަހު އިމްޕޯޓް ކުރެވުނު މުދަލުގެ އަގު ވަނީ އިތުރުވެފަ އެވެ.
- މިދިޔަ މަހު 4.7 ބިލިއަން ރުފިޔާގެ މުދާ ވަނީ އިމްޕޯޓްކޮށްފައި
- މިއީ ހަ އިންސައްތައިގެ އިތުރުވުމެއް
ނިމިދިޔަ މަހު ދައުލަތަށް ލިބުނު އާމްދަނީ 2023 ވަނަ އަހަރުގެ އެޕްރީލް މަހާ އަޅާބަލާއިރު، 0.5 އިންސައްތަ ވަނީ އިތުރުވެފަ އެވެ. މި އަހަރުގެ އެޕްރީލް މަހު ދައުލަތަށް އާމްދަނީގެ ގޮތުގައި ލިބިފައިވަނީ 310 މިލިއަން ރުފިޔާ އެވެ.
މިދިޔަ މަހު އަގުގެ ގޮތުން އެންމެ ގިނައިން އިމްޕޯޓްކުރި ގައުމުތަކާއި އެ ގައުމުތަކުން އިމްޕޯޓް ކުރެވުނު މުދަލުގެ އަގުތައް (ސީއައިއެފް އަގު):
- އޮމާން - 778 މިލިއަން ރުފިޔާ (16 އިންސައްތަ)
- އިންޑިއާ - 761 މިލިއަން ރުފިޔާ (16 އިންސައްތަ)
- ޗައިނާ - 722 މިލިއަން ރުފިޔާ (15 އިންސައްތަ)
- ސިންގަޕޫރު - 537 މިލިއަން ރުފިޔާ (11 އިންސައްތަ)
- ޔޫއޭއީ - 467 މިލިއަން ރުފިޔާ (10 އިންސައްތަ)
މިދިޔަ މަހު އަގުގެ ގޮތުން އެންމެ ގިނައިން އެކްސްޕޯޓް ކުރި ގައުމުތައް:
- ތައިލެންޑް (45 އިންސައްތަ)
- އިނގިރޭސި ވިލާތް (15 އިންސައްތަ)
- ޖަރުމަނު ވިލާތް (12 އިންސައްތަ)
- ސްވިޒަލެންޑް (8 އިންސައްތަ)
- އިންޑިއާ (4 އިންސައްތަ)
މި އަހަރުގެ އެޕްރީލް މަހު 20،382 ޑިކްލަރޭޝަން ޕްރޮސެސްކޮށްފައިވެ އެވެ. ނިމިދިޔަ އަހަރުގެ އެޕްރީލް މަހު ޕްރޮސެސްކޮށްފައިވަނީ 19،957 ޑިކްލަރޭޝަނެވެ. މިދިޔަ މަހު ރާއްޖޭން ބޭރުން އައި 124 އުޅަނދަކަށް ކްލިއަރެންސް ދީފައިވާއިރު، 2023 ވަަނަ އަހަރުގެ އެޕްރީލް މަހު 117 އުޅަނދަކަށް ކްލިއަރެންސްދީފައިވެ އެވެ. ނިމިދިޔަ މަހު ރާއްޖޭން ބޭރަށް ފުރުމަށް 162 އުޅަނދަކަށް ކްލިއަރެންސް ދީފައިވާއިރު، 2023 ވަނަ އަހަރުގެ އެޕްރީލް މަހު 129 އުޅަނދަކަށް ކްލިއަރެންސް ދީފައިވެ އެވެ.
މިދިޔަ އެޕްރީލް މަހު ރޯޔަލްޓީގެ ގޮތުގައި ތިން މިލިއަން ރުފިޔާ ދައުލަތަށް ލިބިފައިވެ އެވެ.
