މުދައްރިސުން ތަމްރީނު ކުރުމަށްޓަކައި ގައުމީ ފެންވަރުގައި ޕްރޮގްރާމެއް ކުރިއަށްގެންދިއުމާ ގުޅޭ ގޮތުން މަޝްވަރާކުރެއްވުމަށް ރާއްޖޭގެ ގައުމީ ޔުނިވަރސިޓީ އާއި ދިވެހިރާއްޖޭގެ އިސްލާމީ ޔުނިވަރސިޓީގެ އިސްވެރިންނާ މިނިސްޓަރ ޑރ. އިސްމާއީލް ޝަފީއު ވަނީ މިއަދު ބައްދަލުކުރައްވާފަ އެވެ.
މި ބައްދަލުވުމުގައި ރާއްޖޭގެ ގައުމީ ޔުނިވަރސިޓީގެ ޗާންސެލަރ މަހުމޫދު ޝައުގީ، ރާއްޖޭގެ އިސްލާމީ ޔުނިވަރސިޓީގެ ވައިސް ޗާންސެލަރ ޑރ. އަލީ ޒާހިރު އަދި ޔުނިވަރސިޓީތަކުގެ އިސްވެރީން ބައިވެރިވެ ވަޑައިގެންނެވި އެވެ.
އެބައްދަލުވުމުގައި ވާހަކަދައްކަވަމުން މިނިސްޓަރު ޝަފީއު ވަނީ ފެންވަރު ރަނގަޅު މުދައްރިސުން ހޯދަން ދަތިވާ މައިގަނޑު އެއް ސަބަބަކީ އޭ-ލެވެލް ނިންމާ ދަރިވަރުންގެ ތެރެއިން ތައުލީމީ ދާއިރާއަށް ޝައުގުވެރިކަން ހުރި ދަރިވަރުންގެ އަދަދު މަދުކަމަށް ފާހަގަކުރައްވާފައެވެ. އެހެންކަމުން މުދައްރިސުން ތަމްރީނުކުރުމުގެ އެ ޕްރޮގްރާމްގެ އަމާޒަކީ މުދައްރިސްކަމުގެ ދާއިރާއަށް ވަންނަ ދަރިވަރުންގެ އަދަދު އިތުރުކޮށް، އޭގެ މަންފާ ދިގު މުއްދަތަކަށް ތައުލީމީ ނިޒާމަށް ލިބިގެންދިއުންކަމަށް މިނިސްޓަރު ވިދާޅުވި އެވެ.
މުދައްރިސުން ތަމްރީނުކުރުމުގެ ޕްރޮގްރާމްގެ ސާމްޕަލް އައުޓްލައިންތައް ތައްޔާރު ކުރުމުގެ މަސައްކަތް މިހާރުވެސް ކުރިއަށްދާއިރު، މި ޕްރޮގްރާމް ވިލަރެސްކޮށް، ކުރިއަށްގެންދިއުމަށް ހަމަޖެހިފައިވަނީ ރާއްޖޭގެ ގައުމީ ޔުނިވަރސިޓީއާއި އިސްލާމިކް ޔުނިވަރސިޓީ ބޭފުޅުންގެ ފަންނީ ލަފައާ އެކުގައެވެ. އަދިމުދައްރިސުން ތަމްރީނު ކުރާއިރު، އެންމެ ބޮޑަށް އިސްކަންދިނުމަށް ހަމަޖެހިފައި ވަނީ މުދައްރިސުން ލިބުން ދަތިވާ މާއްދާތަކާއި، ރަށްތަކަށް ހާއްސަ އިސްކަމެއް ދީގެންކަމަށް ތައުލީމީ ވުޒާރާއިން މައުލޫމާތު ދެއެވެ.
ރާއްޖޭގެ ތައުލީމީ ނިޒާމަށް ކުރިމަތިވެފައިވާ އެންމެ ބޮޑު އެއް ގޮންޖެހުމަކީ ތަމްރީނުވެފައި ތިބި ފެންވަރު ރަނގަޅު މުދައްރިސުން ލިބުން ދަތިވުމެވެ. ސަރުކާރު ސްކޫލުތަކުގައި މި ދިރާސީ އަހަރު ވެސް 1,900 އެއްހާ ބިދޭސީ މުދައްރިސުން މަސައްކަތް ކުރައްވަމުން އެބަގެންދަވައެވެ. އަދި މުޅިން އަލަށް މި ދިރާސީ އަހަރު 156 ބިދޭސީ މުދައްރިސުން ސްކޫލުތަކާ ގުޅިވަޑައިގެންނެވި އެވެ.
ދިވެހި މާއްދާ އާއި އިސްލާމް މާއްދާ ކިޔަވައިދޭ 300 މުދައްރިސުން ތިއްބަވާ އިރު، އޭގެ ތެރޭގައި ގިނައީ އުމުރުން 55 އަހަރު ވެފައިވާ ބޭފުޅުންނެވެ. އެހެންކަމުން ކޮންމެ ވަގުތަކުވެސް އަރލީ ރިޓަޔަމެންޓް ނެންގެވުމުގެ ފުރުސަތު ބޮޑުކަން ފާހަގަކުރެވޭކަމަށް އެ ވުޒާރާއިން ބުނެއެވެ. މީގެއިތުރުން މުދައްރިސުންގެ އާބާދީގައި އަންހެން ބޭފުޅުން ގިނަ އިރު، އަހަރެއްގެ މައްޗަށް އެވްރެޖްކޮށް 500 ބޭފުޅުން މެޓަރނިޓީ ލީވް ނަގާކަމަށްވެސް މިނިސްތްރީން ފާހަގަކުރެއެވެ.
ރާއްޖޭގެ ސްކޫލްތަކުގައި ކިޔަވައިދޭ މުދައްރިސުންނަކީ ދިވެހި މުދައްރިސުންނަށް ހެދުމަށްޓަކައި ގައުމީ ފެންވަރުގެ މުދައްރިސުން ތަމްރީން ކުރުމުގެ ޕްރޮގްރާމެއް އިފްތިތާހުކުރުމަކީ ރައީސް ޑރ. މުޙައްމަދު މުއިއްޒުގެ ރިޔާސީ ވައުދުފުޅެކެވެ.
