ރައީސް މިހެން ވިދާޅުވެފައިވަނީ "ސްމާޓް މޯލްޑިވްސް: ޑިޖިޓަލް އިންކްލޫސިވް ކޮމިއުނިޓީއަކާ ދިމާއަށް ކުރާ ދަތުރު" މި މައުލޫއަށް އެންޓިގުއާ ބާބިއުޑާގައި ކުރިއަށް ދާ ސްމޯލް އައލެންޑް ޑިވެލޮޕިން ސްޓޭޓްސް (ސިޑްސް) ގެ 4 ވަނަ ކޮންފެރެންސްގައި ވާހަކަދައްކަވަމުންނެވެ.
ރައީސް ގެ ވާހަކަފުޅުގައި އެމަނިކުފާނު ވަނީ އެހެން ގިނަ ކުދި ޖަޒީރާ ގައުމުތައް ފަދައިން ރާއްޖޭގައި ގުދުރަތީ ވަސީލަތްތައް މަދުކަމަށް ވިދާޅުވެ އިގްތިސޯދު ފުޅާކުރެވޭނެ ވަސީލަތްތައް މަދުކަމަށް ފާހަގަކުރައްވާފަ އެވެ.
މި ގޮންޖެހުންތަކަކީ އަބަދުވެސް ދިމާވާ ގޮންޖެހުންތަކެއް ކަމަށްވީނަަމަވެސް ހިތްހަމަޖެހޭ ފެންވަރެއްގެ އާންމު ހިދުމަތްތައް ފޯރުކޮށްދީ، އެންމެންނަށް ހަމަހަމަ ފެންވަރެއްގެ ތަރައްގީއެއް ކަށަވަރުކުރުމަކީ ކޮންމެ ސަރުކާރަކަށްވެސް ފަސޭހަކަމެއް ނޫންކަމަށް ރައީސް މުއިއްޒު ވިދާޅުވި އެވެ.
އެގޮތުން މި ޑިޖިޓަލް ޒަމާނުގައި ޓެކްނޮލޮޖީގެ ގެ ގިނަގުނަ ވަސީލަތްތައް ހުރުމަކީ ސިޑްސް ގެ ގައުމުތަަކަށް ލިބިގެންދާ ހެޔޮ ހަބަރެއްކަމަށް ރައީސް ފާހަގަކުރެއްވި އެވެ.
ޓެކްނޮލޮޖީ ލިބޭ ވަސީލަތްތައް ބޭނުންކުރެވެން އޮތް އެންމެ ފުޅާދާއިރާއަކަށް ބޭނުންކޮށްފިނަމަ މޫސުމަށް އަންނަ ބަދަލުތަކާ އެކު އުޅެން ދަސްވެ، ސިއްހީ ފަރުވާ އިތުރުކޮށް، ތައުލީމީ ނިޒާމު ކުރިއަރުވާ އާންމު ހިދުމަތް ފޯރުކޮށްދިނުން ރަނގަޅުވެ, އިގްތިސާދު ފުޅާކޮށް އިތުރު އެހެނިހެން ފުރުސަތުތައް އުފެދިގެން ދާކަމަށް ރައީސް ވިދާޅުވި އެވެ.
މީގެ އިތުރުން ސައިބާ ސެކިއުރިޓީ ދަށްވުމުގެ ސަބަބުން ގިނަ މައްސަލަތަކެއް ދިމާވާކަމަށް ރައީސް ވިދާޅުވިއެވެ. އެގޮތުން ހުއްދަނެތި އެކްސެސް ލިބުން، އެކަުންޓް ހައިޖެކް ކުރުމާއި ޑޭޓާ ބްރީޗިން ދަނީ ދުވަހުން ދުވަހަކަށް އިތުރުވަމުންކަމަށް ރައީސް ފާހަގަކުރެއްވި އެވެ.
ޑިޖިޓަލް ދުނޔެއަށް އާ އިންގިލާބުގެ ސަބަބުން ޖަރީމާ ހިންގުމަށް ބޭނުންކުރާނެ މީހުންނާ ދެކޮޅަށް ޑިޖިޓަލް ފްރޮންޓިއަރުތައް ތަރުބިއްޔަތުކޮށް ވަރުގަދަ ކުރުމަށް އެހީވެދެއެވެ. އަދި މި މިސްރާބަށް ވިސްނައިގެން ރާއްޖެއިން އިން ދަނީ "ހޯލިސްޓިކް ޓެކްނޮލޮޖީ ގަވަރނަންސް" އަށް މަގުފަހިކުރުމާ ދިމާލަށް ނޭޝަނަލް ސެންޓަރ ފޯ ޓެކްނޮލޮޖީގެ ދައުރު އިތުރަށް ފުޅާކުރަމުންކަމަށްވެސް ރައީސް ވިދާޅުވި އެވެ.
ރައީސް ޑރ. މުހައްމަދު މުއިއްޒު އާއި ސަރުކާރުގެ އިސްވަފުދެއް ވަނީ ހަތަރުވަނަ އިންޓަރނޭޝަނަލް ކޮންފަރެންސް އޮން ސްމޯލް އައިލެންޑް ޑިވެލޮޕިން ސްޓޭޓްސް (ސިޑްސް) ގައި ބައިވެރިވެވަޑައިގަތުމަށް އެންޓިގާ ބާބުޑާއަށް ވަޑައިގެންފަ އެވެ.
ސިޑްސްގެ ސަމިޓްގެ ޕްލީނަރީ ސެޝަންގައި ރައީސް ވަނީ ދިވެހިރާއްޖޭގެ ގައުމީ ބަޔާން އިއްވަވާފައެވެ.މީގެ އިތުރުން ސިޑްސް ކޮންފަރެންސްގައި ބައިވެރިވެވަޑައިގަންނަވާ ބޭރު ގައުމުތަކުގެ ވަފްދުތަކުގެ މަތީފަންތީގެ ބައެއް ބޭފުޅުންނާ އެމަނިކުފާނު ވަނީ ބައްދަލުކުރައްވާފަ އެވެ.
