ސްކައިއަށް ދިން އިންޓަވިޔުއެއްގައި، މިހާރު ފްރީ އެޖެންޓެއްގެ ގޮތުގައި ހުރި އެމްބާޕޭ ބުނީ، އޭސީ މިލާނަށް ކެރިއަރުގެ ކޮންމެވެސް ހިސާބެއްގައި ކުޅުމަކީ އޭނާ ވަރަށް ބޭނުންވާ ކަމެއް ކަމަށެވެ. އޭސީ މިލާނަކީ އެމްބާޕޭ ބުނި ގޮތުގައި އޭނާ ކުޑައިރުއްސުރެ ވަރަށް ސަޕޯޓް ކުރާ ކްލަބެކެވެ.
ހަތް އަހަރަށް ފަހު ޕީއެސްޖީ ދޫކޮށް އެހެން ކުލަބަކަށް ބަދަލުވާން އެމްބާޕޭވަނީ ނިންމާފައެވެ. ރިޕޯޓަތައް ބުނާ ގޮތުން އެމްބާޕޭ ބަދަލުވާނީ ސްޕެއިންގެ ރިއާލް މެޑްރިޑަށެވެ. ރެއާލުން މިދިޔަ ދެތިން ހަތަރު ސީޒަންގައިވެސް އެމްބާޕޭ ހޯދުމަށް ކެނޑިނޭޅީ މަސައްކަތް ކުރިއެވެ. އެމްބާޕޭ ޕީއެސްޖީ ދޫކޮށްލާނެކަން ހާމަކޮށްފައިވާއިރު، އޭނާ ކްލަބު ދޫކޮށް މި ދަނީ ކޮންޓްރެކްޓްގެ މުއްދަތު ހަމަކޮށް، ހިލޭ ޓްރާންސްފާގައެވެ.
ރިޕޯޓްތައް ބުނާ ގޮތުން އެމްބާޕޭ ރެއާލްއާ އެކު ފަސް އަހަރުގެ އެއްބަސްވުމެއްގައި ސޮއިކުރަން ނިންމާފައިވާއިރު، ސީޒަނަކަށް 15 މިލިއަން ޔޫރޯ (12.8 މިލިއަން ޕައުންޑް) ލިބޭނެއެވެ. އޭގެ އިތުރުން ފަސް އަހަރު ދުވަހުގެ ތެރޭގައި ދޭން ޖެހޭ 150 މިލިއަން ޔޫރޯ (128 މިލިއަން ޕައުންޑް) ގެ ސޮއިކުރުމުގެ ބޯނަސް ވެސް އޭނާ ލިބޭނެއެވެ. އަދި އޭނާގެ އިމޭޖް ރައިޓްސްއަށްވެސް ފައިސާ ލިބޭނެއެވެ.
