މި ޕްރޮމޯޝަން ރަސްމީ ގޮތުން އިފުތިތާހު ކުރުމަށް އެމްޓީސީސީ ކަށަވަރު ޝޯރޫމްގައި މިއަދު ބޭއްވި ރަސްމިއްޔާތުގައި އެ ކުންފުނީގެ ޗީފް އެގްޒެކެޓިވް އޮފިސަރު އަބްދުالله ޒިޔާދާއި ކުންފުނީގެ އިސްވެރިން ބައިވެރިވެ ވަޑައިގެންނެވި އެވެ.
މި މަހުގެ 15 ވަނަ ދުވަހު ފެށި މި ޕްރޮމޯޝަން ކުރިއަށް ދާނީ އަންނަ ޖުލައި މަހުގެ 15 ވަނަ ދުވަހުގެ ނިޔަލަށެވެ. މި ޕްރޮމޯޝަނަކީ ސުޒުކީ އިންޖީނާއި ސުޒުކީ އިންޖީނުގެ ސްޕެއާ ޕާޓްސް، ސުޒުކީ އިންޖީނުގެ އަޑީތެލާއި ގިޔަރުތެޔޮ އަދި މެރޯލް އައުޓްބޯޑުގެ ސްޓިއަރިން ސިސްޓަމް ގަންނަ ފަރާތްތަކަށް ހާއްސަ ޑިސްކައުންޓުތަކެއް ލިބޭ ޕްރޮމޯޝަނެކެވެ.
އެމްޓީސީސީން ބުނީ މި ޕްރޮމޯޝަނުގެ މަގުސަދަކީ އައުޓްބޯޑު އިންޖީނު ހެޔޮ އަގުގައި ގަންނަން ބޭނުންވާ ފަރާތްތަކާއި ސުޒުކީ އައުޓްބޯޑު އިންޖީނު މަރާމާތު ކުރުމާއި މެއިންޓެނެންސްގެ މަސައްކަތްތަކަށް ބޭނުންވާ ސްޕެއާ ޕާޓްސް ގަންނަން ޝައުގުވެރިވާ ފަރާތްތަކަށް ހެޔޮ އަގެއްގައި ސާމާނު ފޯރުކޮށްދިނުން ކަމަށެވެ.
ސުޒުކީ ފުޓުބޯޅަ ފޯރި 2024 ޕްރޮމޯޝަން އިފުތިތާހުކުރުން - ފޮޓޯ:އެމްޓީސީސީ
މި ޕްރޮމޯޝަނުގެ ދަށުން ކަސްޓަމަރުންނަށް މައުލޫމާތު ފޯރުކޮށްދިނުމަށް ރާއްޖޭގެ އެކި ހިސާބުތަކުގައި ހުރި ބައެއް އޮޑިހަރުގެތަކާއި ބޯޓުޔާޑުތައް އަދި އިންޖީނު މަރާމާތު މަސައްކަތްކުރާ ވޯކްޝޮޕްތަކާއި ސާވިސް ސެންޓަރުތަކަށް އަމާޒުކޮށް ހާއްސަ ފީލްޑް ވިޒިޓްތަކެއް ކުރުމަށް ވަނީ ހަމަޖެހިފައި ކަމަށް އެމްޓީސީސީން ބުނެ އެވެ. އެ ކުންފުނިން ބުނެފައި ވަނީ އެ ކަންކަމުގެ އިތުރުން ދުއްވަމުންދާ އުޅަނދުފަހަރުގެ އިންޖީނު ސާވިސް އިންސްޕެކްޝަން ކުރިއަށް ގެންދިއުމާއި މެއިންޓެނެންސް އާ ގުޅޭގޮތުން އިތުރަށް ހޭލުންތެރި ކުރުމަށް މައުލޫމާތު ފޯރުކޮށްދިނުމަށް ހަމަޖެހިފައިވާ ކަމަށެވެ. އަދި މި ޕްރޮމޯޝަނާ ގުޅޭ އެންމެހާ މައުލޫމާތު ޓީވީ އާއި ރޭޑިއޯގެ އިތުރުން އެ ކުންފުނީގެ ސޯޝަލް މީޑިއާ މަންސަތަކުން ވެސް ފޯރުކޮށްދެމުންދާނެ ކަމަށް އެމްޓީސީސީން ބުނެ އެވެ.
ސުޒުކީ އައުޓްބޯޑް އިންޖީނު ރާއްޖެއަށް ތައާރަފުކޮށްފައި ވަނީ 2007 ވަނަ އަހަރު އެވެ. ވޭތުވެދިޔަ 17 އަހަރުގެ ތެރޭގައި ދިވެހިންގެ މެދުގައި ސުޒުކީ އިންޖީނު މަގުބޫލުވެފައި ވަނީ ތެލުގެ ހަރަދު ކުޑަ އިންޖީނެއްގެ ގޮތުގަ އެވެ. އަދި މި އިންޖީނަކީ އެހެން އިންޖީނުތަކަށް ވުރެ ގިޔަރު ވަރުގަދަ އިންޖީނެކެވެ. ސުޒުކީ އިންޖީނުގެ ގިޔަރު ފަރުމާކުރެވިފައި ވަނީ ގަދަ ރާޅުތަކުގެ ތެރޭގައި ރައްކާތެރިކަމާ އެކު ދަތުރުކުރާއިރު މަޑުޖައްސާލުމަށްފަހު ދުއްވާލި ނަމަވެސް ވަގުތުން ޓޯކް ލިބޭނެ ގޮތަށެވެ.
ސުޒުކީއަކީ ޓެކްނޮލޮޖީގެ ގޮތުން ވެސް ބޮޑެތި ކުރިއެރުންތަކެއް ހޯދާފައިވާ އިންޖީނެކެވެ. މިގޮތުން އިންޖީނު ބޭނުންކުރެވިފައިވާ ގޮތުގެ ޑައިގްނޯސްޓިކް ރިޕޯޓް އިންޖީނުގެ އިލެކްޓްރޯނިކް ކޮންޓްރޯލް މޮޑިއުލް (އީސީއެމް) ގައި ރައްކާކުރެވިފައި ހުރުމުން އިންޖީނަށް މައްސަލައެއް ދިމާވުމުގެ ކުރިން އެ މައްސަލަ ދެނެގަތުމުގެ ގާބިލުކަން ވަނީ ލިބިފަ އެވެ. މީގެ އިތުރުން ސުޒުކީ ޑައިގްނޯސް ސިސްޓަމްގެ މޮބައިލް އެޕްލިކޭޝަން މެދުވެރިކޮށް އޮޑިވެރިޔާގެ ފޯނުން ލޯންޗުގެ ޑިޖިޓަލް ޑިސްޕްލޭ ގޭޖުން ކިއުއާރު ކޯޑް ޖެނެރޭޓްކުރެވި، އިންޖީނުގެ ހާލަތު ދެނެގަނެވޭނެ މައުލޫމާތު ވަގުތުން ލިބިގެންދެ އެވެ.
އެމްޓީސީސީގެ އަމާޒަކީ އަބަދުވެސް ކަސްޓަމަރުންނަށް ލުއިފަސޭހަ ގޮތްތަކެއް ހޯދައިދިނުމެވެ. އެގޮތުން ކޮންމެ އަހަރަކު ވެސް އެކިއެކި ޕްރޮޑަކްޓްތަކުން ކަސްޓަމަރުންނަށް ތަފާތު ޕްރޮމޯޝަންތައް ބޭއްވުމާއި ރާއްޖޭގެ އެކި ކަންކޮޅުތަކުގައި ތިބި އެމްޓީސީސީގެ ކަސްޓަމަރުންނަށް މައުލޫމާތު ފޯރުކޮށްދިނުމުގެ އިތުރުން އިންޖީނުތައް ރަނގަޅަށް ބެލެހެއްޓުމާއި ޓެކްނިކަލް ކަންކަމަށް އަހުލުވެރި ކުރުމުގެ ހަރަކާތްތައް އެ ކުންފުނިން އަބަދުވެސް ރާވާ ހިންގަމުން ގެންދެ އެވެ.
