ޔޫރޯ ފުޓްބޯޅަ މުބާރާތަކީ ޒަމާނުއްސުރެ ދިވެހިންގެ މެދުގައި މަގުބޫލު މުބާރާތެކެވެ. ފީފާ ވޯލްޑްކަޕަށް ފަހު، އެންމެ ގިނަ ބަޔަކު ރާއްޖޭގައި އަބަދުވެސް ބަލާ އެންމެ ބޮޑު އެއް ފުޓްބޯޅަ މުބާރާތަކީ މަހެއްހާ ދުވަހަށް ދެމިގެންދާ، ހަތަރު އަހަރުން އެއް އަހަރު އޮންނަ ޔޫރޯއެވެ. މި ފަހަރުގެ ޔޫރޯ އޮންނާނީ ޖޫން މަހުގެ 14 އިން ޖުލައި 14 އަށެވެ.
ޕީއެސްއެމުން މިއަދު ބޭއްވި މީޑިއާ ބްރީފިންއެއްގައި މެނޭޖިން ޑިރެކްޓަރު ޒީނާ ޒާހިރު ވިދާޅުވީ، ޔޫރޯ ފުޓުބޯޅަ މުބާރާތް ދެއްކުމުގެ ހުއްދަ ލިބިފައިވާ ހަމައެކަނި ދިވެހި ކުންފުންޏަކީ ޕީއެސްއެމް ކަމަށެވެ.
"ޔޫރޯ ދެއްކުމަށް ރައިޓްސް އޮތް ހަމައެކަނި ދިވެހި ފަރާތަކީ ޕީއެސްއެމް. ޕީއެސްއެމްގެ ޓީވީއެމް އަދި ޔޭސްޓީވީން ގެނެސްދޭނަން އިރާދަ ކުރެއްވިއްޔާ،" ޒީނާ ވިދާޅުވި އެވެ.
ޖަރުމަނުގެ 10 ސިޓީއެއްގައި އޮންނަ ޔޫރޯ މުބާރާތުގައި ޖުމުލަ 24 ޓީމު ވާދަކުރާނެއެވެ. މި މުބާރާތުގައި މުޅި އެކު 51 މެޗު ކުޅޭނެ އެވެ.
