ފުށިދިއްގަރު ފަޅު ހިއްކައިގެން ރަސްމާލެ ތަރައްްީކުރުމަކީ ރައީސް ޑރ. މުހައްމަދު މުއިއްޒުގެ އެންމެ ބޮޑު ރިޔާސީ ވައުދެވެ.
ރަސްމާލެއަށް ބޭނުންވާ ފުށިދިއްގަރު ފަޅު ހިއްކަން ހަވާލުކުރީ ލަންކާގެ ކެޕިޓަލް މެރިން އެންޑް އިންވެސްޓްމަންޓް (ސީއެމްސީ) އާއެވެ. އެ މަސައްކަތް ހަވާލުކުރީ ބިން ހިއްކުމުގެ އަގުގެ ގޮތުގައި ފައިސާގެ ބަދަލުގައި މާލެ ސަރަހައްދުން 70 ހެކްޓަރުގެ ބިން 99 އަހަރަށް ދިނުމަށެވެ. އެއީ ފުށިދިއްގަރުން 60 ހެކްޓަރުގެ ބިމާއި ހުޅުމާލެ އިން 10 ހެކްޓަރުގެ ބިން އެކުންފުންޏަށް ދޭ ގޮތަށެވެ.
މިދިޔަ ޑިސެމްބަރު މަހު 18 ވަނަދުވަހު ހިއްކަން ފެށި ފުށިދިއްގަރު ފަޅު ހިއްކާ 8 މަސައްދުވަހުފެތެރޭގައި ނިންމާމެނަކަމަށެވެ. އެހެންނަމަވެސް އެ މަސައްކަތް ފެށިތާ ގިނަދުވަސްތަކެއް ނުވަނީސް ހުއްޓުނު ގޮތަށް މަސައްކަތް ކުރިޔަކަށް ނުދެއެވެ. ކޮންސްޓްރަކްޝަން މިނިސްޓަރު މުއްތަލިބު ކުރިން ވިދާޅުވީ ބިން ހިއްކުމުގެ މަސައްކަތް ހުއްޓުނީ އެތަން ހިއްކަން ބޭނުންވާ ވަރަށް އެ ސަރަހައްދުން ވެލި ނުލިބިގެންކަމަށެވެ. އެހެންކަމުން ވެލި ނަގާނެ އެހެން ސަރަހައްދެއް ހޯދަމުން އަންނަކަމަށެވެ.
ކޮންސްްޓަރަކްޝަން މިނިސްްޓްރީގެ މަސައްކަތް ކުރިޔަށް ދާގޮތް ހާމަކުރުމަށް މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު މުއްތަލިބު ވިދާޅުވީ ފުށިދިއްގަރުފަޅު ހިއްކަން ބޭނުންވާ ފައިސާ އެ މަސައްކަތް ހަވާލުކުރި ކުންފުނި ސީއެމްސީ އަށް ނުހޯދިގެން މަޝްރޫއު މަޑުޖެހިފައިވާކަމަށެވެ. އެހެންކަމުން ސަރުކާރުން އަލުން މަސައްކަތް ފެށޭނެ އެހެން ގޮތެއް އޮތްތޯ ބަލަމުންކަމަށެވެ. އަދި މިހާރުދާ ގޮތުން ހިއްކުމުގެ މަސައްކަތް ނިމެނޭނީ މިއަހަރުގެ ނިޔަލަށްކަމަށްވެސް މިނިސްޓަރު މުއްތަލިބު ވިދާޅުވިއެވެ.
މަޝްރޫއު ރޭވި ގޮތަށް ކުރިޔަށް ނުގެންދެވުނު ސަބަބެއްކަމަށް މިނިސްޓަރުޔ މުއްތަލިބް ވިދާޅުބީ ބަޖެޓްގައި އެ މަސައްކަތް ހިމެނުމުން ބަޖެޓުން އުނިކޮށްފައިވުންކަމަށެވެ.
މުއްތަލިބް ވިދާޅުވީ ރޭވިގޮތަށް މަސައްކަތް ކުރުޔަށް ނުދިނަމަވެސް އެ މަޝްރޫއުގެ މަސައްކަތް ކުރަމުންދާކަމަށެވެ. އެގޮތުން ފުށިދިއްގަރު ފަޅު ހިއްކާ ނިމުމުން އެތަނުގައި ފަށާ ހައުސިން މަޝްރޫއުގެ މަސައްކަތް މިހާރު ހަމަޖެހިފައިވާކަން މުއްތަލިބު ފާހަގަކުރެއްވިއެވެ.
