މުއްތަލިބް މިހެން ވިދާޅުވީ އެ ވުޒާރާއިން މިދިޔަ 6 މަސްދުވަހު ކުރި މަސައްކަތްތައް ހާމަކުރުމަށް މިއަދު ބޭއްވި ނޫސްވެރިންގެ ބައްދަލުވުމުގައެވެ.
ވެރިކަމަށް ވަޑައިގެން ރައީސް މުއިއްޒު ދެކުނަށް ކުރެއްވި ދަތުރުފުޅުގެ ތެރެއިން ތިނަދޫ އެއާޕޯޓް އަޅަން ސޮއިކުރީ މިދިޔަ ފެބްރުއަރީމަހުގެ 20 ވަނަދުވަހުއެވެ. ތައިލެންޑްގެ ޕޭން ޕެސިފިކް ކުންފުންޏާއި އެކު ދިވެހި ސަރުކާރުގެ ފަރާތުން އެއްބަސްވުމުގައި ސޮއިކުރީ ވަޒީރު މުއްތަލިބެވެ.
މި އެއްބަސްވުމުގައި ސަރުކާރުން ސޮއިކުރުމުން ތައިލެންޑްގެ ޕޭން ޕެސިފިކް ކުންފުންޏަކީ އެފަދަ ބިޔަ މަޝްރޫއުތައް ހިންގާފައި ނުވާ ޕޭޕާ ކުންފުންޏެއްކަމަށް ބުނެ އެތައް ބަޔަކު ފާޑުކިޔެވެ. މި ފާޑުކިޔުންތައް އަމާޒުވުމުން އޭރު ސަރުކާރުން ބުނީ ޕޭން ޕެސިފިކް އާ އެކު ސޮއިކުރުމަކީ އެއާޕޯޓްގެ ހެދުމުގެ ކުރިން ހަދަން ޖެހޭ ދިރާސާ ހަދަން ވީ އެއްބަސްވުމެއްކަމަށެވެ.
ނޫސްވެރިންނާއި ވާހަކަ ދައްކަވަމުން ވަޒީރު މުއްތަލިބް ވިދާޅުވީ އޭރު އެމްއޯޔޫގައި ސޮއިކުރި މައިގަޑު ބޭނުމަކީ މަސައްކަތަށްް އަންނަ އިންވެސްޓަރުންނަށް މަސައްކަތުގެ އަގު ހަދަން ފަސޭހަކޮށްދިނުމަށް ކަމަށެވެ.
މުއްތަލިބު ވިދާޅުވީ އެ އެއްބަސްވުމުގެ ދަށުން ތިނަދޫ އެއާޕޯޓްގެ މަޝްރޫއެުގެ ޕްރޮފޯޒަލް މިހާރު ނިމިފައިވާކަމަށެވެ. އަދި އެ ޕްރޮޕޯޒަލް އިންވެސްޓް މޯލްޑިވްސްއަށް ހުށައަޅާފައިވާކަން އެނގިފައިވާކަމަށްވސް މުއްތަލިބް ވިދާޅުވިއެވެ.
ތިނަދޫގައި ހަދާ އެއާޕޯޓްގެ ކުރުހުމެއް
ތިނަދޫގައި ބައިނަލްއަގްވާމީ އެއާޕޯޓެއް ތަރައްޤީކުރަނީ އެރަށުގެ ފަޅު ހިއްކައިގެންނެވެ. އެ މަޝްރޫއުގެ ތެރެއިން 4 ކިލޯމީޓަރުގެ ރަންވޭއަކާއި އިންޓަނޭޝަނަލް އަދި ޑޮމެސްޓިކް ޓާމިނަލެއްގެ އިތުރުން ސީޕްލޭން ޓާމިނަލެއް ގާއިމުރާނެކަމަށް ސަރުކާރުން ވަނީ ބުނެފައެވެ. މީގެއިތުރުން 2،000 އެނދު ހިމެނޭ ގޮތަށް މަތީ ފަންތީގެ 12 ރިސޯޓާއި މެރީނާއަކާއި ފްލައިން ސްކޫލެއް އެޅުމަށްވެސް ޕޭން ޕެސިފިކް ހުށައަޅާފައިވާކަމަށް ދިވެހި ސަރުކާރުން ވަނީ ބުނެފައެވެ.
މި މަޝްރޫއަށް 400-600 މިލިއަން ޑޮލަރު އިންވެސްޓްކުރަން ވަނީ ހަމަޖެހިފައެވެ.
