ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން އަރަބިއްޔާ އިމާރާތް އަޅަން ދިނީ ބާ ޖަމާލުއްދީން ހުރި ބިމެވެ. ނަމަވެސް މި ސަރުކާރު އައިސް ރައީސް ޑރ. މުހައްމަދު މުއިއްޒު ވަނީ ކުރީގެ ކުނިކޮށި ހުރި ބިންކަމުގައިވާ 381 ނަންބަރު ކޮށިގައި އެ އިމާރާތް އެޅުމަށް ބަދަލު ކުރައްވައިފަ އެވެ. އަދި އެއީ އަރަބިއްޔާގެ ދާއިމީ ބިން ކަމަށް އެ މަނިކުފާނު ވަނީ ނިންމަވައިފަ އެވެ. އަދި 2 އަހަރު ދުވަހުން މަސައްކަތް ނިންމާގޮތަށް އަރަބިއްޔާ ސްކޫލްގެ އާ އިމާރާތުގެ އަމަލީ މަސައްކަތް ފަށާފައިވަނީ ފެބްރުއަރީ މަހުގައެވެ.
"ސީއެންއެމް" އަށް މައުލޫމާތުދެމުން އެޑިއުކޭޝަން މިނިސްޓްރީގެ މީޑިއާ އޮފިޝަލު ވިދާޅުވީ އަރަބިއްޔާ ސްކޫލް އަޅަން ހަމަޖެހިފައިވާ ބިން ޖޫން މަހު ހުސްވާނެކަަމަށާއި ބިން ހުސްވުމާއެކު އެ ސްކޫލްގެ ކޮންކްރީޓް މަސައްކަތް ފެށިގެންދާނެކަމަށެވެ. އެ ބިން ކުރިން ހަވާލުކޮށްފައި އޮތީ އާރުޑީސީ އަށެވެ.
މީގެއިތުރުން ކޮންސެޕްޓް ފައިނަލްވެފައިވާކަމަށާއި ހުރިހާ ޓެކްނިކަލް މަސައްކަތެއްވެސް ނިމުމަކާ ގާތްވެފައިވާކަމަށް މިނިސްޓްރީގެ މީޑިއާ އޮފިޝަލު ވިދާޅުވިއެވެ.
ކުރީ ސަރުކާރުން އަރަބިއްޔާގެ އާ އިމާރާތް އެޅުމަށް ނިންމާފައިވަނީ 6 ފަންގިފިލާއަށެވެ. އެހެންނަމަވެސް މި ސަރުކާރުން ވަނީ މަޝްރޫއުގެ ޑިޒައިނަށް ބަދަލުތަކެއް ގެނެސް 10 ފަންގިފިލާއަށް އެޅުމަށް ނިންމާފަ އެވެ.
އަރަބިއްޔާ ސްކޫލް އިމާރާތް ކުރުމަށް އަމީން ކޮންސްޓްރަކްޝަންއާ ހަވާލުކުރީ 168.5 މިލިއަން ރުފިޔާއަށެވެ. ނަމަވެސް ކުރެހުމަށް ގެންނަ ބަދަލާއެކު މި އަގު އިތުރުވެގެންދާނެ އެވެ.
އަރަބިއްޔާ ސްކޫލްގެ ކުދިންނަށް އާ އިމާރާތެއް ނުލިބި، އެއްތަނުން އަނެއް ތަނަށް ބަދަލުވުން އާންމުވުމުން އެ ސްކޫލްގެ ބެލެނިވެރިންގެ ޝަކުވާ މިދިޔަ ސަރުކާރުގައި ވަރަށް ބޮޑުވި އެވެ. އެހެންވެ، ރައީސް މުއިއްޒު ވެރިކަމުގެ ކެމްޕެއިންގެ ތެރޭގައި ދެއްވި އެންމެ ބޮޑު އެއް ޔަގީން ކަމަކީ އެ ކަމަށް ދާއިމީ ހައްލެއް ހޯއްދަވައި ދެއްވާނެ ކަމެވެ.
