މިނިސްޓަރު މިހެން ވިދާޅުވީ، ސިންގަޕޫރުގެ އިންޓަނޭޝަނަލް އިންސްޓިއުޓް ފޯ ސްޓްރެޓެޖިކް ސްޓަޑީސްގެ ފަރާތުން ބޭއްވި "ޝަންގްރިލާ ޑައިލޮގް 2024"ގައި ވާހަކަފުޅު ދައްކަވަމުންނެވެ.
ގައްސާން ވިދާޅުވީ ރައީސް ޑރ. މުހައްމަދު މުއިއްޒުގެ ސިޔާސަތުގައި ދިފާޢީ ގާބިލުކަން އިތުރުކޮށް ރާއްޖޭގެ ވަށައިގެންވާ ކަނޑުގެ ސަރަހައްދުގެ ރައްކާތެރިކަން ކަށަވަރުކުރުމުގައި އިސްކަންދެއްވާ ކަމަށާއި ދިފާއީ ގުޅުންތައް ވަރުގަދަ ކުރި ނަމަވެސް އެއްވެސް މާނައެއްގައި ދިވެހި ބިމުގައި ބޭރުގެ ސިފައިން ގާއިމްވެ ތިބުމަށް ދިވެހި ސަރުކާރުން ބޭނުން ނުވާ ކަމަށެވެ.
ރާއްޖެ ފަދަ ކުދި ގައުމުތަކުގެ މިނިވަންކަމާއި ސަލާމަތީ ކަންކަން ކަށަވަރުކޮށްދެއްނީ ބައިނައްލަގުވާމީ ގާނޫނުތަކުން ކަމަށާއި އެހެން ނަމަވެސް ފަހަކަށް އައިސް ބައެއް ބޮޑެތި ގައުމުތަކުން އެ ގާނޫނުތަކާއި އުސޫލުތަކަށް އަމަލުނުކުރާ ކަަމަށް ވެސް އޭނާ ވިދާޅުވިއެވެ. އޭގެ ސަބަބުން ކުދި ގައުމުތަށް ދިފާއީ ގޮތުން ބަލިކަށިވެ، އަމިއްލަ މިނިވަންކަން ކަށަވަރު ކުރުމަށް ބޮޑެތި ގައުމުތަކާއިއެކު ދިފާއީ ގުޅުން އުފައްދަންޖެހޭ ކަން އޭނާ ފާހަގަކުރެއްވި އެވެ.
ސިފައިންގެ 70 ވަނަ އަސާސީ ތަމްރީނު ކޯހުގެ ދަރިވަރުން ހުވާ ކުރުމާއި ބަޑި ހަވާލުކުރުމުގެ ރަސްމިއްޔާތުގެ ތެރެއިން
ރާއްޖެއަކީ އަބަދުވެސް ބައިނައްލަގުވާމީ ގާނޫނުތަކަށް އަމަލުކުރާނެ ގައުމެއްކަމުގެ ޔަގީންކަންދެއްވަމުން މިނިސްޓަރު ވިދާޅުވީ، ރާއްޖޭގެ އަމިއްލަ ދިފާއީ ނިޒާމު ވަރުގަދަކުރުމަށްޓަކައި އެހެން ގައުމުތަކާއި ގުޅުން ބަދެހިކުރަންޖެހޭ ކަމަށެވެ. އަދި އެއީ ރައީސް ޑރ. މުއިއްޒުގެ އަމާޒު ކަމަށް ވެސް ވިދާޅުވި އެވެ.
ގައްސާން ބައިވެރިވެވަޑައިގަންނަވާ، އައިއައިއެސްއެސް ޝަންގްރިއްލާ ޑައިލޮގަކީ އޭޝިއާގެ ޕްރިމިއާ ޑިފެންސް ސަމިޓެކެވެ. އެއީ މި ސަރަޙައްދުގެ އެންމެ ބޮޑު ސަލާމަތީ ގޮންޖެހުންތަކާ މެދު ވަޒީރުން ބަހުސްކޮށް، ގައުމުތަކުގެ މުހިންމު މަޝްވަރާތަކުގައި ބައިވެރިވެވަޑައިގަންނަވާ ބައްދަލުވުމެކެވެ. މިއަހަރުގެ މި ބައްދަލުވުން ކުރިއަށްދަނީ 31 މެއި–2 ޖޫންއަށް ސިންގަޕޫރުގައެވެ.
