މި ޖަމްއިއްޔާގެ މެމްބަރުކަން ފަލަސްތީނަށް ދޭން ނިންމީ 77ވަނަ ވޯލްޑް ހެލްތު އެސެމްބްލީގައެވެ. މި ނިންމުމާއި އެކު ވޯޓުލުން ފިޔަވާ، އެހެން ގައުމުތަކަށް ލިބޭ ހުރިހާ ހައްގެއް ފަލަސްތީނަށްވެސް ލިބޭނެއެވެ.
ޑަބްލިއުއެޗްއޯގެ މެމްބަރު ގައުމުތަކުގެ ހުރިހާ ހައްގެއް ދިނުމަށް ވޯލްޑް ހެލްތު އެސެމްބްލީން ފާސްކުރި ގަރާރަށް ބޮޑު ތަރުހީބެއް ލިބުމާ އެކު، ޑަބްލިއުއެޗްއޯގެ މެމްބަރެއްގެ ގޮތުގައި ބަލައިގަތުމަށް ވަނީ ފާސްކޮށްފައެވެ. އދ.ގެ އާންމު މަޖިލީހުގައި ފަލަސްތީނުގެ ދަރަޖަ އަލަށް މަތިކުރުމާ ގުޅޭ ގަރާރު ފާސްކޮށްފައިވަނީ 101 މެމްބަރުންގެ ވޯޓުންނެވެ.
ރައީސް ޑރ. މުހައްމަދު މުއިއްޒު ވަނީ މި ނިންމުމާއި އެކު ފަލަސްތީނަށް މަރުހާބާ ވިދަޅުވެފައެވެ. ރައއީސް މުއިއްޒު ވިދާޅުވީ މީ ފަލަސްޠީނުގެ ފުރިހަމަ ދައުލަތެއް އޮތުމަށް ބައިނަލްއަޤްވާމީ ތާއީދު އިތުރުވެފައިވާކަމުގެ ނިޝާނެއްކަމަށެވެ.އަދި މި ޤަރާރަށް ރާއްޖެއިން ތާއީދުކުރަން ނިންމީ، ފަލަސްޠީނުގެ ރައްޔިތުންނަށް ދައުލަތެއްގެ ހައިސިއްޔަތު ނުލިބި އޮތް ޙައްޤަށާއި، ބައިނަލްއަޤްވާމީ ޖަމާޢަތްތަކުގެ ފުރިހަމަ މެންބަރުކަމަށް ދިވެހި ރައްޔިތުން ވަރަށް ބޮޑަށް ތާޢީދުކުރާތީކަމަށެވެ.
މި ނިންމުމާއި ގުޅިގެން ރާއްޖޭގެ ސިއްހީ ވަޒީރު ޑރ. އަބްދުﷲ ހަލީލް އެކްސްގައި ކުރެއްވި ޕޯސްޓެއްގައި ވިދާޅުވީ ފަލަސްޠީނުގެ ރައްޔިތުންނަށް ލިބެންޖެހޭ ހައްޤުތައް ކަށަވަރު ކުރުމަށް ރާއްޖޭގެ ރައީސުލްޖުމްހޫރިއްޔާ ޑރ. މުއިއްޒުގެ ފުރިހަމަ ލަފާފުޅާއެކު އިސްލާމީ ޤައުމުތަކާއެކު ވާލްޑް ހެލްތު އެސެމްބްލީގައި ރާއްޖޭން ވަރަށް ބޮޑަށް ވަކާލާތުކޮށްފައިވާކަމަށެވެ.
ސްވިޒަލޭންޑްގެ ޖެނީވާގައި އޮތް 77 ވަނަ ވޯލްްޑް ހެލްތް އެސެމްބްލީގެ ތެރެއިން
ސްވިޓްޒަލޭންޑްގެ ޖެނީވާގައި އޮތް 77 ވަނަ ވޯލްްޑް ހެލްތް އެސެމްބްލީގައި ވާހަކަދައްކަވަމުން ފަލަސްތީނަށް ސިއްހީ އެހީތެރިކަން އަވަހަށް ފޯރުކޮށްދިނުމަށް ހެލްތް މިނިސްޓަރު ޑރ.އަބްދުﷲ ހަލީލް ވަނީ ގޮވާލައްވާފައެވެ.
އިންސާނީ ހައްގުތަކަށް ހޭލުންތެރިކުރުމުގެ ގޮތުން އާންމުކޮށް ވާހަކަ ދައްކަވަމުން، ސިއްހަތަކީ އިންސާނީ ހައްގެއް ކަމުގެ އުސޫލުތައް ހިއްސާކުރި ނަމަވެސް، ހަނގުރާމާގެ ސަރަހައްދުތަކުގަޔާއި ހާއްސަކޮށް ގާޒާގައި ދިރިއުޅޭ ރައްޔިތުން ދަތި އުނދަގޫތައް ތަހައްމަލްކުރަމުން އަންނަކަމަށް މިނިސްޓަރު ވިދާޅުވިއެވެ.
ފަލަސްތީނަށް އަވަސް އެހީ ފޯރުކޮށްދިނުމުގެ ގޮތުން ދުނިޔޭގެ ސިއްހީ ޖަމިއްޔާއަށް ދޭ ސަޕޯޓު ހަރުދަނާކޮށް، ސިއްހީ ހިދުމަތްތެރިންނާއި ސިއްހީ ފެސިލިޓީތަކުގެ ރައްކާތެރިކަމަށް ވަކާލާތުކުރުމަށް މިނިސްޓަރު ވަނީ ގޮވާލާފައެވެ. އަދި ބައިނަލްއަގްވާމީ ގާނޫނުތައް ދަމަހައްޓަން އިލްތިމާސްކޮށް ފަލަސްތީނަށް އިންސާނީ އެހީ ފޯރުކޮށްދިނުމަށް ހުއްދަ ދިނުމަށްވެސް މިނިސްޓަރު ވަނީ އެ ފޯރަމްގައި ގޮވާލާފަ އެވެ.
