ޕޯޓޯ އާއި އިންޓަ މިލާނާއެކު ޗެމްޕިއަންސް ލީގު ކާމިޔާބުކުރި ޕޯޗުގަލް ކޯޗު، މިދިޔަ ޖެނުއަރީ މަހު އިޓަލީގެ ސެރީއާގެ ރޯމާއިން އޭނާ ވަކިކުރި ފަހުން އޭނާ ކޯޗިންގެ އެއްވެސް މަސައްކަތެއް ކޮށްފައެއް ނުވެއެވެ.
އުމުރުން 61 އަހަރުގެ ޕޯޗުގަލްއަށް ނިސްބަތްވާ މޮރީނިއޯ، އޭނާގެ އާ ކްލަބު އިއުލާން ކުރީ ޗެމްޕިއަންސް ލީގުގެ ފައިނަލް މެޗު ކުޅުނު ވެމްބްލީ ސްޓޭޑިއަމްގައި ރޭ، ޓީއެންޓީ ސްޕޯޓްސް ޓީވީގެ ޕަންޑިޓެއްގެ ގޮތުގައި ވާހަކަ ދައްކަމުންނެވެ. ތުރުކީގެ އެންޓީވީ ޓީވީ ސްޓޭޝަނުން ބުނާ ގޮތުގައި މޮރީނިއޯގެ މަގާމު ރަސްމީކޮށް އާދީއްތަ ދުވަހު އިއުލާން ކުރުމަށް ވަނީ ހަމަޖެހިފައެވެ.
ޕޯޓޯ އާއި އިންޓަ މިލާނާއެކު ޗެމްޕިއަންސް ލީގު ކާމިޔާބުކުރި ޕޯޗުގަލް ކޯޗުވަނީ ޗެލްސީ، މެންޗެސްޓާ ޔުނައިޓެޑާއި ޓޮޓެންހަމް ހޮޓްސްޕާސް އަދި ރެއާލް މެޑްރިޑް ވެސް ކޯޗުކޮށްދީފަ އެވެ. ފެނަބާޗޭއާއެކު މޮރީނިއޯ ހަދާނީ ދެ އަހަރުގެ އެއްބަސްވުމެއް ކަމަށް ރިޕޯޓްތައް ބުނެއެވެ.
މޮރީނިއޯ ވަނީ 2022 ވަނަ އަހަރު ފުރަތަމަ ފަހަރަށް ޔޫރޮޕާ ކޮންފަރެންސް ލީގު ތަށި ހޯދައި، މިދިޔަ ސީޒަނުގެ ޔޫރޮޕާ ލީގުގެ ފައިނަލަށް ރޯމާ ގެންގޮސްދީފައެވެ.
