ފޮރިން މިނިސްޓަރީގައި ބޭއްވުމަށް ހަމަޖެހިފައިވާ މި ބައްދަލުވުމުގެ މަގުސަދަކީ ރާއްޖެ އާއި އީޔޫއާ ދެމެދު މިހާރު އޮތް ގުޅުން އިތުރަށް ވަރުގަދަ ކުރަން މަޝްވަރާކުރުމެވެ.
މިކަމާ ގުޅޭ ގޮތުން މިނިސްޓްރީން ނެރުނު ބަޔާނެއްގައި ބުނީ ބައްދަލުވުމުގައި ޑިމޮކްރެޓިކް އިސްލާހުތަކާއި، މޫސުމަށް އަންނަ ބަދަލުތައް ކުޑަކުރުމާއި، ހެޔޮވެރިކަމާއި، ޝަރުއީ ދާއިރާ އިސްލާހުތަކާއި ސަލާމަތާ ގުޅޭ ކަންކަމުގެ އިތުރަށް، އިތުރު އެއްބާރުލުން ކަނޑައެޅުމަށް މިހާރު ކުރިއަށްދާ މަސައްކަތްތަކުގެ ނަތީޖާތަކަށް ވެސް ބަލާނެ ކަމަށެވެ.
މި ބައްދަލުވުމުގައި އީޔޫގެ ފަރާތުން އިސްކޮށް ބައިވެރިވެވަޑައިގަންނަވާނީ އެޖަމިއްޔާގެ އޭޝިއާ ޕެސިފިކް ޑިޕާޓްމެންޓުގެ މެނޭޖިން ޑިރެކްޓާ ޕައޮލާ ޕެމްޕަލޯނީ އެވެ. މި ބައްދަލުވުމުގައި ރާއްޖެ ތަމްސީލްކުރާ ވަފުދުގެ އިސް ބޭފުޅަކީ ފޮރިން ސެކްރެޓަރީ ފާތިމަތު އިނާޔާ އެވެ.
މި ބައްދަލުވުމުގައި މިނިސްޓްރީ އޮފް ފޮރިން އެފެއާޒް، ރައީސް އޮފީހާއި، މިނިސްޓްރީ އޮފް ފިނޭންސް، މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް، މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް ބައިވެރިވާނެ އެވެ.
އަދި އެޓާނީ ޖެނެރަލް އޮފީސް، މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީ، ނޭޝަނަލް ކައުންޓާ ޓެރަރިޒަމް ސެންޓަރާއި އެމްއެންޑީއެފް ކޯސްޓްގާޑްގެ އިތުރުން މޯލްޑިވްސް ޕޮލިސް ސާވީސްގެ އިތުރުން ނޭޝަނަލް ރީއިންޓެގްރޭޝަން ސެންޓަރުން ވެސް ބައިވެރިވާނެ އެވެ.
