ޒައިދާންގެ ހަށިގަނޑު މިހާރު އެމްއެންޑީއެފްގެ އުޅަނދެއްގައި އުނގޫފާރަށް ވަނީ ގެންގޮސްފަ އެވެ.
އޭނާ ނިޔާވެފައި ވަނީ، ލ. ކައްދޫގައި ކުރިއަށް ގެންދިޔަ އެމްއެންޑީއެފްގެ މޫދު ޓްރެއިނިންއެއްގައި އިއްޔެ އުޅެނިކޮށް މިޔަރެއް ހަމަލާ ދީގެން ރޭ 20:40 އެހާކަންހާއިރު އެވެ.
ޒައިދާންގެ މޫނު ދެއްކުން އޮންނާނީ މިއަދު މެންދުރު 2 އިން 3އަށް އެ ރަށު އިސްލާމިކް ސެންޓަރުގެ ހޯލުގައި އެވެ. އަދި ކަށުނަމާދު އޮންނާނީ އަސުރު ނަމާދަށް ފަހު އުނގޫފާރު އިސްލާމިކް ސެންޓަރުގައި އެވެ.
މިޔަރެއްގެ ހަމަލާގައި ނިޔާވި ޒައިދާންގެ ޖަނާޒާ އުފަން ރަށުގައި ބާއްވަނީ -- ފޮޓޯ/ އުންގޫފާރު ޑޮޓްކޮމް
މި ހާދިސާއާއި ގުޅިގެން ދިފާއީ ވަޒީރު، މުހައްމަދު ގައްސާން މައުމޫން ވަނީ، ސިފައިންގެ ތަމްރީނެއްގައި ގައުމު ދިފާއު ކުރެއްވުމުގެ މަތިވެރި އަޒުމުގައި ތަމްރީނަށް ހަރަކާތްތެރިވެވަޑައިގަންނަވަނިކޮށް ލިބިވަޑައިގެންނެވި އަނިޔާއިން ދެމިއޮތުމުގެ އާލަމަށް ދަތުރު ކުރެއްވި ޒައިދާންގެ ފުރާނަފުޅަށް ސުވަރުގޭގެ ދާއިމީ ނިއުމަށް މިންވަރުކޮށްދެއްވުމަށް އެދި ދުއާ ދަންނަވާފަ އެވެ.
އަދި މި ހާދިސާގައި ޒައިދާންގެ އާއިލާއަށް ލިބުނު ފުން ހިތާމައިގައި ބައިވެރި، ވަޒީރު ވަނީ، އާއިލާއަށް ތައުޒިޔާ ފޮނުއްވާފަ އެވެ.
ކަށުނަމާދުގައި ބައިވެރިވުމަށް އެމްއެންޑީއެފްގެ ބައެއް އޮފިސަރުން ވެސް ވަނީ އުނގޫފާރަށް ވަޑައިގެންފަ އެވެ.
