ޖޭއެސްސީ އެކުލަވާލައިފާވާ ގޮތުން، އެ ކޮމިޝަންގައި ރައްޔިތުންގެ މަޖިލީހުގެ މެންބަރަކުވެސް އިންނަވައެވެ. މިދިޔަ ފަސް އަހަރު އެ މަގާމުގައި އިންނެވީ އޭރު ވެރިކަމުގައި އޮތް އެމްޑީޕީން ނޮމިނޭޓް ކުރި ގާނޫނީ ވަކީލް އަދި އޭރުގެ ތުޅާދޫ ދާއިރާގެ މެންބަރު ހިސާން ހުސެއިންއެވެ. ހިސާން ފަހުން ވެވަޑައިގަތީ ޖޭއެސްސީގެ ރައީސްއަށެވެ. ޖޭއެސްސީގެ ރައީސްއަކީ ޖޭއެސްސީގެ މެންބަރުންގެ ތެރެއިން ހޮވާ މަގާމެކެވެ.
އާ މަޖިލީހުން، ޖޭއެސްސީގެ މެންބަރުކަމަށް ރިޒާގެ ނަން ހުށަހެޅުއްވީ މިއަދު، މަނަދޫ ދާއިރާގެ މެމްބަރު ހުސްނީ މުބާރިކް އެވެ. ހުސްނީގެ ހުށަހެޅުއްވުމަށް މާފަންނު ދެކުނު ދާއިރާގެ މެންބަރު އަބްދުﷲ ރިފާއު ވަނީ ތާއީދު ކުރައްވާފަ އެވެ. ޖޭއެސްސީއަށް ރިޒާ އިންތިހާބު ކުރުމާމެދު ވޯޓު ނެގުން އޮންނާނީ މިއަދުގެ ވޯޓް ގަޑީގަ އެވެ. ވޯޓް ނަގާނީ މެންދުރު 1:00 ގައެވެ. ވެރިކަން ކުރާ ޕީއެންސީގެ ސާފު އަގުލަބިއްޔަތު މަޖިލީހުގައި އޮތުމުން ރިޒާ އެ މަގާމަށް އައްޔަން ކުރާނެކަން މިވަނީ ކަށަވަރުވެފަ އެވެ.
ޖޭއެސްސީގައި މަޖިލީހުގެ ރައީސް ވެސް އިންނަވަ އެވެ. މަޖިލީހުން ކަނޑައަޅާ އާންމު މީހަކާއި ބަންޑާރަ ނައިބާއި ރައީސް ކަނޑައަޅުއްވާ މެންބަރަކާއި ސުޕްރީމް ކޯޓާއި ހައިކޯޓުން ކަނޑައަޅާ މެންބަރެއް ވެސް ޖޭއެސްސީގައި އިންނަވާނެ އެވެ.
ގިނަ ދުވަސްތަކެއް ވަންދެން ޖުޑީޝަރީގައި މަސައްކަތް ކުރައްވާފައިވާ ރިޒާއަކީ މިހާރު އޮތް މަޖިލީހުން، އެ މަގާމަށް އެންމެ ރަނގަޅު އެއް މެންބަރު ކަމަށް ގިނަ ބަޔަކު ދެކެއެވެ. ހުސައިން ރިޒާއަކީ މިސްރުގެ އަލްއަޒްހަރު ޔުނިވާސިޓީން މަތީ ތައުލީމު ހާސިލުކުރައްވާފައިވާ ބޭފުޅެކެވެ. އޭނާވަނީ ކުރިމިނަލް ކޯޓުގައި ކުރިން މަސައްކަތްކުރައްވާފަ އެވެ.
