ފުލުހުން ބުނީ މި ޕްރޮގްރާމް ކުރިއަށް ގެންދިއުމަށް ހަަމަޖެހިފައިވަނީ ވަނީ އދ. އަތޮޅު ފުލުހުންނާއި ސައިބަރ ސެންޓަރު ގުޅިގެން، މަހިބަދޫ، މާމިގިލި، ދަނގެތި، ދިގުރަށް، އޮމަދޫ އަދި ފެންފުށީގައިކަމަށެވެ.
ޖޫން 2 އިން 7 އަށް ކުރިއަށް ގެންދާ މި ޕްރޮގްރާމުގައި، އިންޓަނެޓް މެދުވެރިކޮށް ހިންގާ ކުށްތަކާއި އެފަދަ ކުށްތަކުން ރައްކާތެރިވާނެ ގޮތުގެ މައުލޫމާތުދޭއިރު، އިންޓަނެޓު މެދުވެރިކޮށް ގަނާކުރުމާއި އެކަމުގެ ޝިކާރައަށްވާ މީހުންނަށް އެކަމުގެ ސަބަބުން ކުރިމަތިވާނެ ގެއްލުންތަކާ ގުޅޭގޮތުންވެސް މައުލޫމާތުދޭނެކަމަށް ފުލުހުން ބުނެ އެވެ. އަދި އެފަދަ ކަންކަމުން ރައްކާތެރިވުމަށް އެޅިދާނެ ފިޔަވަޅުތަކާ ގުޅޭގޮތުން ވެސް މައުލޫމާތު ހިއްސާކުރަން ހަަމޖެހިފައިވާކަމަށް ފުލުހުން ބުނެ އެވެ.
މީގެއިތުރުން މަކަރާއި ހީލަތުން ފައިސާ ހޯދުމަށް އަންނަ ފޯނު ކޯލުތަކުން ރައްކާތެރިވުމަަށާއި އެކަންކަމުން ރައްކާތެރިވެތިބުމަށް ކުރެވިދާނެ ކަންކަމާ ގުޅޭގޮތުން މައުލޫމާތުދިނުމަށް ހަމަޖެހިފައިވެ އެވެ. އަދި އޮޅުވާލައިގެން ފައިސާ ހޯދުމުގައި ބޭނުންކުރަމުންގެންދާ އެންމެ ފަހުގެ އުކުޅުތަކާއި އެފަދަ ކަންކަމުން ރައްކާތެރިވާނެ ގޮތްތަކުގެ މައުލޫމާތު ހިއްސާކުރާނެކަމަށް ފުލުހުން މައުލޫމާތުދެ އެވެ.
ސްކޫލުތަކުގެ ދަރިވަރުންނާއި ބެލެނިވެރިންނާއި ރަށުގެ ރައްޔިތުންގެ އިތުރުން މުއައްސަސާތަކުގެ މުވައްޒަފުންނަށް ކުރިއަށް ގެންދާ މި ޕްރޮގްރާމްގައި މައުލޫމާތުދެއްވަނީ ސައިބަރ ސެންޓަރުގެ މުވައްޒަފުންކަމަށް ފުލުހުން ބުނެ އެވެ.
