އެމްއެންޑީއެފުން ރޭ ބުނީ ނިޔާވީ ލ. ކައްދޫގައި މިވަގުތު ކުރިއަށްދާ ސިފައިންގެ ތަމްރީނެއްގެ ތެރެއިން ލ.މާވަށް ކައިރިން ކަނޑުގައި ތަމްރީނުގެ ބައެއް ކުރިއަށްދަނިކޮށް މިޔަރެއް ހަމަލާ ދިނުމުން ފަރުވާދެމުންދިޔަ ރ. އުނގޫފާރު، ނިއުލައިފް، ލާންސްކޯޕްރަލް މުހައްމަދު ޒައިދާން 23، ކަމަށެވެ.
އޭނާ ނިޔާވީ ގަމު ރީޖަނަލް ހޮސްޕިޓަލުގައި ފަރުވާ ދެމުންދަނިކޮށް ރޭ 20:40 އެހާއިރުކަމަަށްވެސް އެމްއެންޑީއެފުން ބުންޏެވެ.
ޒައިދާންގެ ޖަނާޒާ ބާއްވާފައިވަނީ މިއަދުގެ އަސްރު ނަމާދަށް ފަހު އޭނާގެ އުފަށް ރަށް ރ. އުނގޫފާރު އިސްލާމީ މަރުކަޒުގަ އެވެ.
މި ޖަނާޒާގައި އެމްއެންޑީއެފް ނޮދަން އޭރިއާ ކޮމާންޑްގެ ކޮމާންޑާ ބްރިގޭޑިއާ ޖެނެރަލް އިސްމާއީލް ޝަރީފާއި އެޖުޓަންޓް ޖެނެރަލް ބްރިގޭޑިއާ ޖެނެރަލް އަބްދުﷲ އިބްރާހީމާއި ކޯސްޓްގާޑްގެ ކޮމަޑާންޓް ބްރިގޭޑިއާ ޖެނެރަލް މުހައްމަދު ސަލީމް ބައިވެރިވެ ވަޑައިގެން، އާއިލާއާ ބައްދަލު ކުރައްވައި ތައުޒިޔާ ވިދާޅުވި އެވެ.
މި ޖަނާޒާއަށް ފަހު ސަންދޯކުގައި އަޅާފައި އޮތް ދިވެހިރާއްޖޭގެ ގައުމީ ދިދަ، ކޯޕްރަލް މުހައްމަދު ޒައިދާންގެ އާއިލާއާ ވަނީ ހަވާލު ކޮށްފަ އެވެ.
ޒައިދާން ނިޔާވުމާ ގުޅިގެން އެކަމުގެ ހިތާމައި ގައި މިއަދުން ފެށިގެން ދެ ދުވަސް ވަންދެން ސިފައިންގެ ދިދަ، ސިފައިންގެ މަރުކަޒުތަކުގައި ވަނީ ބައި ދަނޑިއަށް ތިރިކޮށްފަ އެވެ.
އެމްްއެންޑީއެފުން ބުނީ ޒައިދާންގެ ޖަނާޒާ ބާއްވާފައިވަނީ ރަސްމީ އިއްޒަތުގައި ދެ ވަނަ ދަރަޖައިގައި ކަމަށެވެ. އަދި ޖަނާޒާގައި ސިފައިންގެ ހަތް ބަޑީގެ ސަލާމެއް އަރުވާފައިވާ ކަމަށް ވެސް ބުންޏެވެ.
